काठमाडौं, २३ फागुन — बलिउड अभिनेता सञ्जय दत्त प्रायः विवादमा रहिरहन्छन् । तर अहिले चाहिँ उनी कुनै विवादमा छैनन् ।

उनको एक प्रशंसकले गरेको कामका कारण उनी अहिले चर्चामा छन् । ती प्रशंसकले आफ्नो सबै सम्पत्ति सञ्जय दत्तको नाम गरिदिएकी छन् । 

सञ्जयलाई बैंक अफ बडोदाका तर्फबाट पत्र आएपछि उनी पनि छक्क परे । बैसट्ठी वर्षीया निशि हरीशचन्द्र त्रिपाठीले सबै सम्पत्ति सञ्जय दत्तको नाममा सारिदिएको पत्रमा लेखिएको थियो । 

उनले आफ्ना परिवारका मानिसलाई नभई सञ्जय दत्तलाई सम्पत्ति दिएकी रहिछन् । निशिको बैंक लकर कानूनी औपचारिकताका लागि खोलिएको छ । 

यसबारेमा सञ्जय दत्तले भने, ‘अभिनेता हुनुका नाताले हामीले यस्ता कुराको सामना गरिरहेका हुन्छौं । कहिलेकाहीँ प्रशंसकहरूले आफ्नो बच्चाको नाम हाम्रै नामबाट राखिदिन्छन् । हामीलाई सडकमा पछ्याउँछन् । हामीलाई उपहार दिन्छन् । तर यस्तो घटना चाहिँ मैले कहिल्यै भोगेको थिइनँ । म यो सम्पत्तिमा दाबी गर्दिनँ । म यो प्रशंसकलाई चिन्दैनथिएँ र यो घटनाले मलाई छक्क पारिदियो ।’

एजेन्सी