काठमाडौं, २९ फागुन — इन्टरनेसनल क्रिकेट काउन्सिल (आईसीसी) को विश्वकप छनोट खेलमा भाग लिएका दश टोलीका खेलाडीहरूमध्येको सर्वोत्कृष्टको सूचीमा नेपाली क्रिकेट टीमका कप्तान पारस खड्का पनि परेका छन् । 

क्वालिफायरको ग्रूप चरण सकिँदा नेपाल लगायत चार टोली अघिल्लो चरणमा त जान सकेनन् तर कप्तान पारस खड्काले प्रतियोगितामा उत्कृष्ट प्रदर्शन गरे । 

खड्काका बारेमा आईसीसी लेख्छ :

उनी नेपालका सबभन्दा प्रिय क्रिकेटर हुन् र उनले वर्षौंदेखि आफ्नो प्रसिद्धअनुसारको प्रदर्शन गरेका छन् । नेपालको ब्याटिङ लाइनअपले प्रतियोगितामा राम्रो प्रदर्शन गर्न नसकेको भएपनि पारसले जिम्बाब्वेविरुद्ध ४०, स्कटल्यान्डविरुद्ध ६३ र अफगानिस्तानविरुद्ध ७५ रन बनाए । यी सबै टोलीको बलिङ आक्रमण सशक्त थियो । अन्तिम खेलमा उनी हङकङविरुद्ध चलेनन् र जम्मा ११ रन बनाए तर खुशीको कुरा त्यो खेलमा नेपाल विजयी भयो । 

आईसीसीले जारी गरेको उत्कृष्ट खेलाडीको सूचीमा पारस खड्काबाहेक आयरल्यान्डका विलियम पोर्टरफील्ड, पापुआ न्यू गिनीका टोनी उरा, स्कटल्यान्डका क्यालम म्याकलीयोड, जिम्बाब्वेका ब्रेन्डन टेलर, हङकङका अंशुमान रथ र एहसान खान, जिम्बाब्वेका सिकन्दर रजा, यूएईका रोहन मुस्तफा, अफगानिस्तानका मोहम्मद नबी र वेस्ट इन्डिजका जेसन होल्डर परेका छन् ।