विराटनगर, ६ चैत-नेपाली कांग्रेसले प्रदेश १ को प्रमुख सचेतकमा केदार कार्कीलाई चयन गरेको छ । कांग्रेस संसदीय दलको विधान २०७४ बमोजिम प्रदेशसभाका सदस्य कार्कीलाई प्रदेश १ को संसदीय दलको तर्फबाट प्रमुख सचेतक मनोनित गरेको हो ।

कार्कीलाई प्रमुख सचेतकमा चयन गरेको कांग्रेस संसदीय दलका नेता राजीव कोइरालाले जानकारी दिए । कार्कीलाई मनोनयन गरेको पत्र कोइरालाले मंगलबार सभामुख प्रदीपकुमार भण्डारीलाई बुझाएका छन् । मोरङ क्षेत्र नम्बर ६ को ‘ख’ बाट प्रदेशसभा सदस्यमा कार्की निर्वाचित भएका थिए ।

शेखर कोइरालानिटक रहेका कार्कीले कांग्रेस संसदीय दलको नेता पदमा समेत उम्मेदवारी दर्ता गराएका थिए । तर अन्तिम समयमा उम्मेदवारी फिर्ता लिएर कोइरालालाई समर्थन गरेक थिए ।

कांग्रेसले संसदीय दल कार्यसमितिलाई पनि पूर्णता दिएको जनाएको छ । समितिको उपनेतामा हिमाल कार्कीलाई मनोनयन गरिएको छ भने सचिव शिवनारायण सिंह, कोषाध्यक्ष लिला सुब्बा, सदस्यहरुमा चुमनारायण तवदार, ओमप्रकाश सरावगी, ज्योती सुब्बा, नबोदिता चौधरी र विन्दीया कार्की रहेका छन् ।