नेपालगन्ज, ९ चैत– कानुन व्यवसायीको छाता संगठन बार एसोसिएसनको राष्ट्रिय सम्मेलन शुक्रबारबाट शुरु हुँदै छ । पूर्वप्रधानन्यायाधीश गोपाल पराजुलीको बहिर्गमनलाई लिएर बहस चलिरहेका बेला हुन लागको राष्ट्रिय सम्मेलनमा बारले स्वतन्त्र न्यायपालिकाको मुद्दालाई प्राथमिकतामा राख्ने भएको छ । 

छलफलमा मुलुकभरका करिब ३ हजार कानुन व्यवसायी सहभागी हुनेछन् । सम्मेलनको मुख्य नारा ‘स्वतन्त्र, निष्पक्ष, सक्षम न्यायपालिकाप्रति प्रतिबद्धताः कानुन व्यवसायीको पेसागत दक्षता एवं सुनिश्चितता’ तय गरिएको छ ।

तीनदिने सम्मेलनमा १० वटा विषयमा प्यानल बनाएर छलफल गरी नेपालगन्ज घोषणापत्र जारी गरिनेछ । 

सम्मेलनको उद्घाटन राष्ट्रपति विद्यादेवी भण्डारीले गर्ने कार्यक्रम छ । कामु प्रधानन्यायाधीश दीपकराज जोशी, कानुनमन्त्री शेरबहादुर तामाङ, महान्यायाधिवक्ता अग्निप्रसाद खरेल तथा विदेशी कानुन व्यवसायीको सहभागिता रहनेछ ।