दिल्ली– सन् २०१८ बलिउड कलाकारका लागि दुःखद सावित हुँदै छ । कालो करिणको शिकारसम्बन्धीमा मुद्दामा सलमान खान जेलबाट धरौटीमा रिहा भएको केही दिनमै फेरि एक अर्का बलिउड अभिनेताले जेल जानुपर्ने खतरा बढेको छ । 

बलिउडका हास्य अभिनेता राजपाल यादव एक ठगी मुद्दामा दोषि ठहर भएका छन् । उनीविरुद्ध ५ करोड भारतीय रुपैयाँ ठगी गरेको मुद्दा दर्ता भएको थियो । राजपाल यादव सोही मुद्दामा दोषि ठहर भएका हुन् । 

दिल्ली हाई कोर्टले राजपालसहित उनकी पत्नी र एक कम्पनीलाई ५ करोड रुपैयाँ ठगीको अभियोगमा दोषी ठहर गरेको हो । यो मुद्दामा आगामी २३ अप्रिलमा सजायको फैसला हुनेछ ।

राजपालले ‘अता पता लापता’ नामक फिल्म बनाउन मुरली प्रोजेक्ट्स कम्पनीबाट ५ करोड रुपैयाँ ऋण लिएका थिए । सम्झौताअनुसार समय सीमाभित्र ऋण नबुझाएपछि ऋणधनीले राजपालविरुद्ध दिल्ली हाई कोर्टमा मुद्दा हालेका थिए । 

राजपालले अदालतमा कैयौं पटक ऋण तिर्ने प्रतिबद्धता जनाएपनि पूरा गरेनन् । यही मुद्दामा उनी र उनकी पत्नी  केही दिनका लागि जेल समेत गइसकेका छन् । मुद्दाको अन्तिम सुनुवाई गर्दै अदालतले उनलाई दोषि ठहर गरेको हो । 

पछिल्लो समय खासै फिल्ममा नदेखिएका राजपाल आर्थिक संकटमा रहेको भारतीय सञ्चारमाध्यमले उल्लेख गरेका छन् । उनले ५ करोड ऋण समेत तिर्न नसक्ने अवस्था रहेकाले जेल जाने संभावना बढी रहेको भारतीय सञ्चारमाध्यमले उल्लेख गरेका छन् ।