काठमाडौं, ४ बैशाख- यो वर्षको तेस्रो कारोबार दिन मंगलबार शेयर बजारमा उल्लेख्य सुधार आएको छ ।  मंगलबार कारोबार मापक नेप्से दोहोरो अंकले बढेको छ भने कारोबार पनि उल्लेख्य बृद्धि भएको छ । लघुवित्त र बीमा समूहको नेप्से बढ्दा समग्र नेप्से सूचक नै उकालो लागेको हो ।   

मंगलबार १६६ कम्पनीका १८ लाख ९५ हजार कित्ता शेयर ९५ करोड ४० लाख रुपैयाँमा खरिद बिक्री भयो । यो सोमबारको तुलनामा ३८ करोड रुपैयाँ बढी हो । सोमबार ५७ करोड ६८ लाख रुपैयाँको कारोबार भएको थियो । 

मंगलबार नेपाल स्टक एक्सचेन्ज(नेप्से)को कारोबार मापक सूचक ३३ दशमलव ६१ अंकले बढेर १३३१ दशमलव १८ अंकमा उक्लिएको छ । क बर्गका कम्पनीहरुको कारोबार मापन गर्ने सेन्सेटिभ इन्डेक्स ६.३२ अंकले बढेर २८२.५८ अंकमा पुगेको छ ।

मंगलबार बिमा समूह ५ दशमलव ५१ प्रतिशत बढ्दै ६ हजार आठ सय ९८ अंकमा उक्लिएको छ । यसै गरी लघुवित्त समुहमा ७ दशमलव ६९ प्रतिशतले बृद्धि भएको छ ।  मंगलबार लघुवित्त समूह १२० दशमलव ११ अंकले बढेर १६८१ दशमलव ८० अंकमा उक्लिएको छ। बैंक समुहमा १२ दशमलव २, होटल ८६ दशमलव ०१, विकास बैंक ३५ दशमलव ५१, जलबिद्युत ४० दशमलव ८२, फाइनान्स ८ दशमलव ९४, उत्पादनमुलक ५४ दशमलव ९९ र अन्य २१ दशमलव ९९ अंकले बढेका छन्, ट्रेडिङ समूह भने ५ दशमलव ५७ अंकले घटेको छ।

मंगलबारको कारोबारमा बीमा र लघुवित्त समुहले अग्रता लिएका छन् । बीमा समुहको मात्रै मंगलबार ३८ करोड रुपैयाँको शेयर किनबेच भयो । लघुबित्त समूहको २० करोडको कारोबार भएको छ । मंगलबार सबैभन्दा बढी सुर्य लाईफ इन्स्योरेन्स कम्पनीको करिब ६ करोड रुपैयाँको कारोबार भयो ।

मंगलबार कारोबारमा आएका १५३ कम्पनीको शेयर मूल्य बढ्यो भने १३ कम्पनीको मात्रै मूल्य घटेको छ । सबैभन्दा बढी महिला सहयात्रा माइक्रोफाइनान्सको १० प्रतिशत मूल्य बढेको छ। सहयोगी विकास बैंकका शेयरधनीले करिब पाँच प्रतिशत गुमाए ।