'चीट सारेर' इञ्जिनियर, सेन्ट्रल इञ्जिनियरिङ कलेजबाट सजिलै पाइन्छ प्रमाणपत्र !

बैशाख ६, २०७५

जनकपुरधाम, ६ वैशाख–परीक्षामा कडाइ गरिएपछि सेन्ट्रल इञ्जिनियरिङ कलेज जनकपुरका विद्यार्थीले मंगलबार बीई सिभिल इञ्जिनियरिङको परीक्षा बहिष्कार गरे । मोडेल बहुमुखी क्याम्पस केन्द्रमा परीक्षा दिन पुगेका ६७ मध्ये ६५ परीक्षार्थीले सो दिन परीक्षा दिएनन्, दुईजना मात्र सहभागी भए ।

केन्द्राध्यक्ष वीरेन्द्रकुमार साहसहितको टोलीले चेकजाँचका नाममा आफूहरूलाई कपडा खोल्न लगाएको, जथाभावी र अमर्यादित ढंगले चेकजाँच गरेको तथा अपशब्द प्रयोग गरेको आरोप परीक्षा बहिष्कार गर्ने परीक्षार्थीहरूको आरोप छ । सोही आरोपसहित केन्द्र परिवर्तन गर्न माग गर्दै विद्यार्थीहरूले पूर्वाञ्चल विश्वविद्यालयका डीनलाई ज्ञापनपत्र बुझाए । केन्द्रध्यक्षमाथि पनि कारबाही हुनुपर्ने उनीहरूको माग थियो ।

यस विषयमा जाँचबुझ गर्न पूर्वाञ्चल विश्वविद्यालयले पर्यवेक्षक रामनारायण बिच्छालाई पठायो । घटनालाई नियालेपछि पर्यवेक्षक बिच्छाले उनीहरूको आरोप तथ्यहीन भएको निष्कर्ष निकाले । पर्यवेक्षक विच्छाले लोकान्तरसँग भने, ‘विद्यार्थीहरूले झुटो आरोप लगाएको पाइयो, परीक्षा केन्द्र पनि परिवर्तन हुँदैन र बहिष्कार गरेको परीक्षा पुनः सञ्चालन हुन पनि सक्दैन ।’

चेकजाँचको सिसीटिभी फुटेजसमेत देखाउँदै केन्द्राध्यक्ष साहले विद्यार्थीहरूको आरोप गलत रहेको बताए ।

‘विगतमा पनि सेन्ट्रल इञ्जिनियरिङ कलेजको परीक्षा यही केन्द्रमा हुन्थ्यो, तर मधेस आन्दोलन र विभिन्न परिस्थितिका कारण परीक्षालाई मर्यादिन बनाउन सकेनौँ,’ साहले भने, ‘अहिले स्थानीय सरकार, प्रदेश सरकार र संघीय सरकार बनिसकेको छ, परिस्थिति अनुकुल भएकाले परीक्षालाई मर्यादित बनाउन पहल गर्दा विद्यार्थीले आरोप लगाएका हुन् ।’

फेल भयो विद्यार्थीको चालबाजी !

यसअघि २०७३ चैतमा सो कलेजका विद्यार्थीको परीक्षाकेन्द्र जानकी कलेज अफ म्यानेजमेन्टमा तोकिएको थियो । चैत २१ गते छैठौं सेमेस्टरको परीक्षामा कडाइ गरियो । केन्द्राध्यक्ष बलराम झाले क्याम्पसको प्रवेशद्वारमै चेकजाँच गराएर मात्र परीक्षार्थीलाई हलमा प्रवेश दिए । सो क्रम चैत २४ को परीक्षामा पनि जारी रह्यो ।

त्यसपछि ७६  जना परीक्षार्थीले अहिलेको वर्षजस्तै ‘हतकण्डा’ अपनाए । परीक्षा बहिष्कार गरेर डीनलाई दबाब दिन विराटनगर पुगे । अन्ततः उनीहरूको दबाबले काम गर्‍यो, परीक्षा केन्द्र परिवर्तन भयो । रामस्वरूप रामसागर बहुमुखी क्याम्पसमा बाँकी परीक्षा उनीहरूले चाहेजसरी नै सम्पन्न भयो । यद्यपि बहिष्कार गरेको विषयको पुनः परीक्षा भने भएन ।

यसपटक पनि परीक्षार्थीले सोही सूत्र अपनाएका थिए, तर सफल हुन सकेन ।

अन्ततः बहिष्कार गर्ने परीक्षार्थीहरू बाध्य भएर बुधबार अर्को विषयको परीक्षामा सहभागी भएको केन्द्राध्यक्ष साहले जानकारी दिए ।

चीट सारेर इञ्जिनियर !

जनकपुरमा चार वर्षे बीई इञ्जिनियरिङ गराउने कलेज सेन्ट्रल इञ्जिनियरिङ कलेज मात्र हो । २०६७ सालदेखि पूर्वाञ्चल विश्वविद्यालयको सम्बन्धन लिएर सो कलेज सञ्चालन भइरहेको छ ।

हालसम्म यस कलेजमा २ सय ९८ विद्यार्थी भर्ना भए । त्यसमध्ये १०० जना पास भएर सिभिल इञ्जिनियर बनिसकेका छन् । ७० जना नतिजाको पर्खाइमा छन् भने, बाँकी विभिन्न तहको परीक्षा दिइरहेका छन् ।

सन् २००९ मा उक्त कलेजका २४ जना विद्यार्थी भर्ना भएकोमा २२ जना, सन २०१० मा ४८ मध्ये ४७ जना, सन २०११ मा १७ भर्ना भएको मध्ये ६ जना पास भइसकेका छन् । ‘यस कलेजमा अध्ययनरत विद्यार्थीमध्ये अधिकांश सरकारी जागिरे छन्, ओभरसियर पदमा कार्यरत ती कर्मचारीहरूले जनही ७ लाख रुपैयाँ शुल्क कलेजमा तिरेका छन्, तर कक्षामा सहभागी भने हुँदैनन्,’ स्रोतले भन्यो ।

यहाँ पढ्ने विद्यार्थी जनकपुरभन्दा बाहिरका नै बढी छन् । ‘हाम्रो कलेजमा इञ्जिनियरिङ पढ्नका लागि काठमाडौं, धादिङदेखि सुर्खेतसम्मका विद्यार्थी  आएका छन्,’ क्याम्पसका व्यवस्थापक बब्लु झाले भने, ‘प्रदेश २ का ८ वटै जिल्लाका विद्यार्थी यहाँ छन् ।’ तीमध्ये अधिकांश सरकारी जागिरे रहेको उनले स्वीकारे । चीट चोर्न पाइन्छ भनेर नै ती विद्यार्थी यस कलेजमा आएका हुन् त ? जवाफमा झा भन्छन्, ‘परीक्षामा चीट चोरी नै नभएको त म भन्दिनँ, तर चोरी होस् भन्ने हामीले पनि चाहेका छैनौं ।’

विद्यार्थीहरूले चिट चोर्न नपाउँदा कतिसम्मको हतकण्डा अपनाउँछन् भन्ने पटक–पटकको परीक्षा बहिष्कारले नै देखाइसकेको छ । यसरी उत्पादन भएका इञ्जिनियरले कस्ता पुल, सडक र भौतिक पूर्वाधार बनाउलान्, त्यो भने सोचनीय विषय छ ।

विश्वविद्यालयको नै शाख गिराउने गरी भइरहेको यस्तो गतिविधिबारे पूर्वाञ्चल विश्वविद्यालयको भने ध्यानाकर्षण हुनसकेको छैन ।

बैशाख ६, २०७५ मा प्रकाशित

अजय अनुरागी

अजय अनुरागी लोकान्तरका लागि प्रदेश नम्बर दुई प्रतिनिधि हुन् । 

लेखकबाट थप...

प्रतिक्रिया दिनुहोस