काठमाडौं, ७ वैशाख– नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले पार्टी एकताका विषमा प्रधानमन्त्रीसमेत रहेका एमाले अध्यक्ष केपी शर्मा ओलीसँग गम्भीर वार्ता गर्ने बताएका छन् । 

समय निर्धारण भइनसके पनि दिउँसो बालुवाटारस्थित प्रधानमन्त्री निवासमा दुई शीर्ष नेताबीच वार्ता हुन लागेको हो ।

शुक्रबार बिहान आफ्नै निवास खुमलटारमा केही निकटस्थ व्यक्तिहरुसँगको भेटमा प्रचण्डले एमालेसँगको पार्टी एकताबाट पछि हट्न नसकिने भन्दै गम्भीर वार्ता गर्ने बताएका हुन् । 

केही द्विविधा र शंकाहरु रहेको भन्दै अध्यक्ष प्रचण्डले त्यसको निवारणको प्रयास गरिरहेको बताएका भेटमा सहभागीले बताए । एमाले नेताहरुको कार्यशैलीका कारण केही संशय पैदा भए पनि त्यसलाई समाधान गर्न आफू क्रियाशिल रहेको प्रचण्डले बताए ।

‘पार्टी एकता नहुँदै त यस्तो व्यवहार देखाउँछन्, भइसकेपछि झन् कस्तो होला ?’ प्रचण्डको भनाइ उद्धृत गर्दै भेटमा सहभागीले भने ।

ओली र प्रचण्डबीच विहीबार पनि वार्ता भएको थियो । एमाले र माओवादीबीच चुनाव चिह्न के राख्ने, विधानको प्रस्तावनामा जनयुद्ध शब्द राख्ने कि नराख्ने र केन्द्रीय समितिमा दुवै पार्टीका कति–कति सदस्य रहने भन्ने विषयमा कुरा मिलेको छैन ।

एमाले र माओवादीबीच यसअघि वैशाख ९ गते नेपाल कम्युनिस्ट पार्टी स्थापना दिवसको दिन एकता घोषणा गर्ने भनिए पनि त्यो सम्भावना कम छ ।