सुर्खेत, ८ वैशाख–कर्णाली प्रदेशका मुख्यमन्त्री महेन्द्रबहादुर शाहीले जनतालाई संघीयता आफ्नै शासन भएको अनुभुति हुने गरि काम गर्न कालिकोटका कार्यालय प्रमुखहरुलाई निर्देशन दिएका छन् । 

विहीबार गृहजिल्ला कालिकोट पुगेका मुख्यमन्त्री शाहीले सदरमुकाम मान्मामा सरकारी कार्यालयका प्रमुखहरुसँगको भेटघाटमा जनताको काममा ढीलासुस्ती नगर्न र खटाईएको कार्यक्षेत्रमा पुगेर काम गर्न निर्देशन दिएका हुन् ।

‘स्थानीय निकायको निर्वाचन संगै कर्मचारी र जनप्रतिनिधि बिच तालमेलको अभाव देखिएको छ ’ मुख्यमन्त्री शाहीले भने ‘कर्मचारीसंग रहेको दक्षता र जनप्रतिनिधिसंग रहेको योजनाको समायोजन गरेर मात्रै मुलुक विकासको दिशामा लम्कन्छ ।’ उनले कर्मचारी भेटघाटमा कार्यालय प्रमुखहरुले राखेका जिज्ञासाको जवाफ दिँदै कर्मचारी समायोजन, कर्मचारी र जनप्रतिनिधिबीच देखिएको असमझदारी लगाएतका समस्याको समाधान गर्न प्रदेश सरकारले पहल गर्ने प्रतिवद्धता व्यक्त गरे ।

‘विकास र समृद्धिको जनअपेक्षा पुरा गर्न प्रदेश सरकार तिव्र गतिमा अगाडि वढेको छ ।’ मुख्यमन्त्री शाहीले भने, ‘सरकारको स्प्रीटमा कर्मचारी प्रशासन दौड्नु पर्ने आवश्यकता छ, त्यसकालागि सबैले सहकार्य गर्न जरुरी छ ।’ उनले कानुनको अभावमा देखिएका समस्या सामाधानका लागि कानुन निर्माणको कामलाई पनि सरकारले तीव्रता दिइरहेको बताए ।

कार्यक्रममा जिल्लाको शान्तिसुरक्षाको अवस्थाका बिषयमा जानकारी दिदै प्रमुख जिल्ला अधिकारी चन्द्रनाथ गौतमले कालिकोट जिल्ला बिकट र कतिपय गाउँमा प्रहरी युनिट समेत नरहेको अबस्थामा शान्ति सुरक्षा कायम गर्न चुनौतीपुर्ण रहेको जानकारी दिए । यस्तो अबस्थामा पनि सरकारी कर्मचारीले गाउँगाँउमा पुगेर सेवा दिईरहेको वताउदै प्रमुख जिल्ला अधिकारी गौतमले कर्मचारीको दुखपीडा वुझेर दण्ड र पुरस्कारको व्यवस्था गर्न माग गरे ।

यसैबीच, मुख्यमन्त्री शाहीको उपस्थितीमा बिहीबार नै जिल्ला दैवी प्रकोप उद्धार समितिको बैठक पनि बसेको छ । वैठकमा गएको चैत २३ गतेको असिना पानीले कृषकहरुको अन्नबाली र फलफुलमा पुर्याएको क्षेतीको अवस्थाका विषयमा समिक्षा भएको छ । संघीय संसदका सदस्य दुर्गबहादुर रावतको समेत सहभागिता रहेको बैठकमा जिल्लामा असिना पानीले कृषकहरुको ९० प्रतिशत अन्नबाली, फलफुल र तरकारी खेतिमा क्षेति पुगेको प्रमुख जिल्ला अधिकारी चन्द्रनाथ गौतमले जानकारी गराए । क्षतिको अवस्था हेर्दा आगामी असारमै भोकमरी शुरु हुन सक्ने तर्फ प्रदेश सरकारले ध्यान दिनुपर्ने प्रमुख जिल्ला अधिकारी गौतमको भनाइ रहेको थियो ।