काठमाडौं, ७ वैशाख– गृहमन्त्री रामबहादुर थापा ‘बादल’ले यातायात क्षेत्रमा रहेको आलोपालो प्रथा (सिण्डिकेट) तोड्ने निर्णयबाट आफू र गृह मन्त्रालय पछि नहट्ने बताएका छन् । 

शुक्रावार यातायात व्यवसायीहरुको ज्ञापन पत्र बुझ्दै गृहमन्त्री बादलले सरकारले गरेको निर्णय व्यवसायीको पक्षमा नै भएकाले आन्दोलनमा नजान पनि आग्रह गरे । 

‘सरकारले अहिले गरेको निर्णय समग्र यातायात व्यवसायीको हितमा छ,’ गृहमन्त्री बादलले भने, ‘हामी केही व्यवसायीको मात्र हैन, सबै व्यवसायीको हित हुनुपर्छ भन्ने पक्षमा छौं ।’

गृहमन्त्री बादलले जनताको दैनिक जीवनसँग जोडिएको यातायात क्षेत्रमा हड्ताल गर्न नहुने भन्दै आन्दोलन फिर्ता लिन व्यवसायीहरुलाई आग्रह गरे । 

यातायात व्यवसायीले जबरजस्ती आन्दोलनमा उत्रिए सरकारले कडा रुपमा सामना गर्ने पनि उनको भनाइ थियो । 

‘व्यवसायीको हितका विषयमा अझै पनि छलफल गर्न सकिन्छ,’ यातायात व्यवसायीहरुको ज्ञापन पत्र बुझ्दै गृहमन्त्री बादलले भने, ‘तर सिण्डिकेट तोड्ने निर्णयबाट गृह मन्त्रालय पछि हट्दैन ।’