काठमाडौं, ९ वैशाख– सिरियाको राजधानी दमास्कसनजिक रहेको रासायनिक हमला भएको भनिएको स्थानको रासायनिक अस्त्रसम्बन्धी अन्तर्राष्ट्रिय विज्ञहरूले अनुगमन गरेका छन् । 

रासायनिक अस्त्रको प्रयोग निषेध गर्ने सङ्गठन–ओपीसीडब्ल्यूको एउटा टोली शनिवार डुमा नगर पुगेको हो ।

टोलीले डुमा नगरमा अनगुमन गर्दै त्यहाँका केही नमूना संकलन गरेको छ । ओपीसीडब्ल्युले प्रेस विज्ञप्ति जारी गर्दै अप्रिल ७ मा रासायनिक आक्रमण भएको भनिएका दुई स्थानमध्ये एक स्थानको भ्रमण गरेको जनाएको छ ।

नाम नखुलाइएका ती नमुना ओपीसीडब्ल्यूको प्रयोगशालामा पठाइने विज्ञप्तिमा उल्लेख छ । 

सिरियाली सरकारी पक्षबाट विद्रोहीहरूको बलियो पकडक्षेत्र मानिएको डुमा नगरमा एप्रिल ७ मा ‘रासायनिक हमला’ गरेको भनिएको जवाफस्वरूप गत शनिबार पश्चिमा शक्तिहरूले सिरियाविरुद्ध क्षेप्यास्त्र हमला गरेका थिए ।

विद्रोहीहरु बाहिरिएपछि अहिले भने डुमा नगर सिरियाली सरकार र रुसको नियन्त्रणमा रहेको छ र दुवै पक्षले त्यस्तो रासायनिक हमला भएको अस्वीकार गर्दै आएका छन् ।