जनकपुरधाम, २६ वैशाख– भारतीय प्रधानमन्त्री नरेन्द्र मोदीको आसन्न भ्रमणलाई लिएर तीनै तहका सरकार तयारीमा व्यस्त छन् । मोदी सिधै जनकपुर आउने कार्यक्रम रहेकाले विशेष गरी जनकपुरमा यसको रौनक छ । 

मोदीको जनकपुर भ्रमणका क्रममा रामायण सर्किटसम्बन्धी सम्झौता हुने तथा जनकपुर–अयोध्या सिधा बस सेवा शुरु गर्ने नेपाल सरकारका परराष्ट्रमन्त्री प्रदीप ज्ञवालीले जनाइसकेका छन् । यसका साथै मोदीलाई नागरिक अभिनन्दन गर्नेगरी जनकपुर उपमहानगरपालिकाले तयारी गरिरहेको छ ।

मोदी नेपाल आउँदा नयाँ सम्झौता गर्ने तयारी भइरहँदा यसअघि नै भारतीय पक्षसँग भएका सम्झौताहरू भने कार्यान्वयनमा आउन सकेका छैनन् । त्यसमध्ये एक हो, जनकपुर–अयोध्या भगिनी शहर सम्झौता ।

२५ नोभेम्बर २०१४ मा साविकको जनकपुर नगरपालिका र भारतको उत्तर प्रदेशस्थित अयोध्या शहरलाई भगिनी शहरका रूपमा विकास गर्ने गरी सम्झौता गरिएको थियो । नेपाल सरकारका तर्फबाट स्थानीय विकास मन्त्रालयका तत्कालीन सचिव पूर्णचन्द्र भट्टराई र भारत सरकारको तर्फबाट नेपालका लागि तत्कालीन भारतीय राजदूत रञ्जित रेले उक्त सम्झौता पत्रमा हस्ताक्षर गरेका थिए ।

तीन वर्षे म्याद रहेको उक्त सम्झौताको अवधि गत नोभेम्बरमा सकियो । सम्झौता नविकरणमा दुवै पक्षले चासो देखाएनन् । सम्झौता सम्झौतामा मात्रै सीमित रह्यो ।

अहिले त्यही सम्झौतालाई नविकरण गर्दै दुई प्रधानमन्त्रीले हरियो झण्डा देखाएर जकपुर–अयोध्या सिधा बस सेवाको शुभारम्भ गर्दैछन् ।

२८ वैशाखमा दुवै प्रधानमन्त्रीले हरियो झण्डा देखाएपछि एउटा बस जनकपुरबाट तीर्थ यात्रीहरू बोकेर अयोध्याका लागि प्रस्थान गर्ने जानकी मन्दिरका छोटे महन्थ राम रोशन दास वैष्णवले जानकारी दिए । उक्त बस अहिले जनकपुरमा आइनपुगेको भए पनि भारतको अयोध्याबाट प्रस्थान गर्ने तयारी भइसकेको उनले बताए ।

यस्तो थियो भगिनी शहर सम्झौता

११ बुँदामा गरिएको उक्त सम्झौतापत्रमा दुवै देशका जनकपुर र अयोध्या शहरका नगरपालिकाको कार्यालयले पालना गर्नुपर्ने शर्तहरू, दुवैको भूमिका, उद्देश्य, गर्नु पर्ने कामहरू, अनिवार्यता, सम्झौताको कार्यान्वयन, संशोधन, अवधि र रद्द हुने शर्तहरू उल्लेख छ ।

दुवै शहरलाई एक आपसमा जोड्नका निम्ति, मित्रवत सम्बन्ध र सहयोग बढाउनका निम्ति त्यो सम्झौता गरिएको हो ।

मुख्यतः दुवै शहरले आ–आफ्ना विशेषज्ञका साथ सेवा प्रदान गर्ने, यातायात, शिक्षा, संस्कृति, खेलकुद, प्रदूषित जल तथा फोहर व्यवस्थापन, पूर्वाधार, वातावरण, जनस्वास्थ्य, विज्ञान तथा प्रविधि, पर्यटन, सांस्कृतिक सम्पदा व्यवस्थापन, श्री विकास लगायतका क्षेत्रहरूमा सहकार्य गरेर विकासका कामहरू अगाडि बढाउने भनेर सम्झौता गरिएको हो । तर, उक्त सम्झौता कार्यान्वयनको दिशामा यसअघि कुनै पनि काम अगाडि बढ्न सकेको थिएन ।

जनकपुर उपमहानगरपालिकाका मेयर लालकिशोर साह भन्छन्, ‘विगतमा जनकपुर अयोध्या भगिनी शहर भनेर सम्झौता गरी पनि जननिर्वाचित प्रतिनिधिको अभावमा कुनै पनि काम अगाडी बढ्न सकेन, दुर्भाग्य त कस्तो भयो भने त्यो सम्झौताको  म्याद बिते पनि नविकरण गर्न सकिएको छैन ।’

तर अब भारतीय प्रधानमन्त्री मोदीको जनकपुर आगमनसँगै उक्त सम्झौता नविकरण तथा सम्झौताअनुसार कामहरू अगाडि बढ्नेमा मेयर साह आशावादी छन् ।

हेर्नुहोस्, सम्झौता :