आईपीएलमा सन्दीपको उत्कृष्ट प्रदर्शन : खेल हेरेपछि प्रचण्डले भने- 'नेपालीको शीर ठाडो भयाे'

बैशाख ३०, २०७५

काठमाडौं, ३० वैशाख– पहिलो नेपाली क्रिकेटरका रुपमा इन्डियन प्रिमियर लिग (आईपीएल) मा डेब्यू गरेका सन्दीप लामिछानेले पहिलो खेलबाटै सबैलाई प्रभावित पार्न सफल भएका छन् । शनिबारको उनको प्रदर्शनको चौतर्फी प्रशंसा भएको छ । 

खेल हेरेपछि ट्वीट गर्दै नेकपा माओवादी केन्द्रका अध्यक्ष पुष्पकमल दाहाल प्रचण्डले उनलाई बधाई दिएका छन् । उनले बधाई दिँदै सन्दीपले नेपालीको शीर ठाडो पार्ने काम गरेको बताए । 


ADVERTISEMENT

यसले नेपाली क्रिकेटमा उर्जा थपेको प्रचण्डको भनाइ छ । प्रचण्डले ट्वीट गर्दै भनेका छन्, ‘ नेपाली क्रिकेट टीमका युवा खेलाडी सन्दीप लामिछानेले इण्डियन प्रिमियर लिगको हिजोको खेलमा उत्कृष्ट प्रदर्शन गरेकोमा हार्दिक बधाई दिन चाहान्छु । आफ्नो पहिलो खेलमा नै महत्वपूर्ण विकेटसहित उनले गरेको कुशल प्रदर्शनले संसारभरीका नेपालीको शीर ठाडो भएको छ ।’

उनले अगाडी लेखेका छन्, ‘यसबाट नेपाली क्रिकेटको विकासका लागि समेत ठूलो उर्जा प्रदान गरेको छ । हामी सबै नेपालीलाई बधाई र नेपाली क्रिकेटको उज्ज्वल भविष्यको शुभकामना। ’

दिल्ली डेयरभिल्सका स्पिनर सन्दीपले रोयल च्यालेन्ज बेंग्लोरविरुद्ध डेब्यू गरेका हुन् । उनी शनिबार नै पहिलो पटक मैदानमा उत्रिएका थिए । सन्दीपले आफ्नो पहिलो खेलमै पुरै स्पेल बलिङ गर्न सफल भए । उनले डेब्यू खेलमै पहिलो विकेट लिए ।

दिल्लीको बलिङ इनिङको २.४ ओभरमै सन्दिपले बेंग्लोरका ओपनर पार्थिव पटेललाई ६ रनमा एलबीडब्लू धरापमा पार्दै आईपीएलकै पहिलो विकेट हात पारे । सन्दीपले ४ ओभरमा २५ रन खर्चे ।

यसअघि शनिबार काठमाडौंमा भएको कार्यक्रममा भारतीय प्रधानमन्त्री नरेन्द्र मोदीले पनि सन्दीपको नाम लिँदै खेलले दुई देशलाई जोडेको बताएका थिए ।

बैशाख ३०, २०७५ मा प्रकाशित

प्रतिक्रिया दिनुहोस