काठमाडौं, १ जेठ-साउदीको ‘अर्काड इञ्जिनियरिङ एण्ड कन्स्ट्रक्सन’ कम्पनीमा खाना बनाउने ‘शेफ’को काम गर्न भनेर गएका मकवानपुरका ज्ञानबहादुर जिम्बालाई भाँडा माझ्न लगाइएपछि उनकी श्रीमती श्रीमानको उद्दारका लागि वैदेशिक रोजगार विभाग धाइरहेकी छिन् ।

‘केएसए इन्टरनेसनल ग्रुप’ नामक म्यानपावरमार्फत् गएका जिम्बाले एजेन्ट वीरबहादुर थिङलाई ९२ हजार रुपैयाँ बुझाएका थिए ।

जाने बेलामा सम्झौतामा हस्ताक्षर गर्दा १८ सय रियल लेखिएको र त्यहाँ पुगेपछि जम्मा १ हजार रियल तलब भएको नयाँ सम्झौता पत्रमा हस्ताक्षर गराइएको पीडित ज्ञानबहादुर जिम्बाकी श्रीमती असली जिम्बाले लोकान्तरलाई बताइन् ।

ज्ञानबहादुरलाई भनिएअनुसारको काम नदिएर भाँडा माझ्न लगाइएपछि उनले काम छाडेर घर फर्किने भन्दै उद्दारका लागि पहल गर्न आग्रह गरेका थिए । दुई महिना काम गर्दा पनि तलब नदिएको भन्दै नेपालस्थित म्यानपावर कम्पनीमा पीडितलाई नेपाल झिकाउन आग्रह गर्दा म्यानपावरले ८ दिनभित्र तलब दिलाइदिने भनेर श्रीमती असली जिम्बालाई भनेको थियो ।

‘त्यस्ता आठ दिनहरू धेरै बिते, तर मेरो श्रीमानले न त तलब पाउनुभयो, न त फर्केर आउनुभयो,’ पीडितकी श्रीमती असलीले गुनासो गरिन् ।

ज्ञानबहादुरले भनेअनुसारको काम नपाएको छ महिना बितिसकेको छ, तर म्यानपावरले उद्दार गर्न कुनै चासो देखाएको छैन ।

वैदेशिक रोजगार विभागका राहत तथा उद्दार शाखाका निर्देशक उद्धवप्रसाद रिजालले म्यानपावरका सञ्चालकलाई बुधवार बोलाइएको र पीडितलाई नेपाल झिकाउन केही समय दिइने बताए । दिइएको समयमा पीडित नेपाल नआए म्यानपावरको कामकारवाही रोकिने छ,' उनले लोकान्तरसँग भने ।