विराटनगर, ८ जेठ– विराटनगर भन्सार कार्यालयले डेढ महिना अघिदेखि ९ बजेपछि कार्यालय संचालन गर्ने निर्णय गरेको भएपनि अझै प्रभावकारी कार्यान्वयन हुन सकेको छैन । भन्सारमा अन्तिम समयमा हुने भिडभाड कम गर्न गरिएको उक्त निर्णय कार्यान्वयन गर्न कर्मचारी बाधक बनेको व्यापारीले आरोप लगाएका छन् । 

भन्सार कार्यालयले भने व्यापारीको बानी नै ढिलो गर्ने लागेको कारण उक्त निर्णय लागू गर्न नसकिएको बताउँछ । विराटनगर भन्सार कार्यालय आसपासको क्षेत्रमा भिडभाड र ट्राफिक जाम बढेको छ । 

भन्सार कार्यालयको यार्ड सानो हुँदा मालबहाक ट्रक र सवारी साधन भन्सार कार्यालयदेखि विराटनगर जुटमिलको खाली जग्गासम्म लाम लागेका छन्  । भन्सार कार्यालयले यस्तो चाप हटाउन बिहान ९ बजे नै पहिलो चरणमा गाडीको चेकजाँच सक्ने र पुन: दिउँसो दास्रो चरणमा चेकजाँच गर्दा भिडभाड हट्ने अपेक्षा सहित ९ बजे देखि नै कार्यालय खोल्न थालेका थिए ।

उक्त निर्णय कार्यान्वयन हुन अझै सकेको छैन । भन्सार कार्यालयले व्यापारीको बानीको सुधार नआएसम्म उक्त निर्णय कार्यान्वयन हुन नसक्ने देखिएकाले आवश्यक छलफल र परामर्श गरिरहेको जनाएको छ । 
विराटनगर भन्सार कार्यालयका प्रमुख मिमांश अधिकारीले सो निर्णय कार्यान्वयनमा व्यापारी नै बाधक भएको बताई रहँदा व्यापारी भने भन्सारकै ढिलासुस्तीले यस्तो भएको बताउँछन्  ।

मोरङ व्यापार संघका अध्यक्ष पवनकुमार सारडाले क्लीयरिङ एजेन्ट नआएका कारण भन्दापनि भन्सार कार्यालयकै कारण सो निर्णय कार्यान्वयनमा ढिलाई भएको बताए । भन्सार कार्यालयकोे परम्परागत सोचका कारण समस्या आएको उनको भनाई छ । 

व्यापार संघका अध्यक्ष सारडाले भिडभाड हटाउनका लागि एकीकृत जाँच चौकी ९आईसीपी० निर्माणमा तदारुकता अपनाउनु पर्नेमा जोड दिए ।