काठमाडौं, ८ जेठ - त्रिभुवन अन्तर्राष्ट्रिय विमानस्थलबाट साढे ३३ किलो सुन तस्करी र सनम शाक्य हत्या प्रकरणका मुख्य अभियुक्त चुडामणि उप्रेती उर्फ गोरेलाई पक्राउ गरी सार्वजनिक गरिएको छ ।

उनलाई राजधानीको गौरीघाट क्षेत्रबाट पक्राउ गरिएको मंगलबार गृहमन्त्रालयमा आयोजित पत्रकार सम्मेलनमा जानकारी दिइयो ।

साढे ३३ किलो सुन तस्करी र सनम शाक्य हत्या प्रकरणको छानबिन गर्न गठित छानबिन समितिका संयोजक एवं गृहमन्त्रालयका सहसचिव ईश्वरराज पौडेलले गोरे काठमाडौं आएको भन्ने विशेष सूचनाका आधारमा मंगलबार बिहान ५:३४ बजे उसकै घर रहेको गौरीघाट क्षेत्रबाट पक्राउ गरिएको जानकारी दिए ।

गोरे काठमाडौं आउँदै गरेको सूचनाका आधारमा विशेष टोली ३ दिनअघिदेखि नै खटिएको उनले बताए ।

गोरेलाई तत्काल विराटनगर चलान गरी जिल्ला अदालत मोरङमा पेश गरिने पौडेलले जानकारी दिए ।

प्रहरीले गोरेको साथबाट थप प्रमाण र सूचनाहरू पनि प्राप्त गरेको जनाएको छ ।