सुर्खेत, ८ जेठ– एक खुट्टाले साइकल चलाउने साइकल यात्री यमलाल रसाइली सुर्खेत आइपुगेका छन् ।

अपाङ्गहरू पनि सपाङ्ग जस्तै अवसर पाएको खण्डमा काम गर्न सक्छन् भन्ने देखाउन मुगुको रारा तालसम्मको सायकल यात्रा तय गरेको रासाइलीले लोकान्तरलाई  बताए ।

२०५९ साल फागुन २६ गते मेची महाकाली साइकल यात्रा गरेका रसाइलीले मुगु कर्णाली प्रदेशको उत्कृष्ट पर्यटकीय गन्तव्य भएकोले सरकारको पर्यटनसम्बन्धी अभियानलाई साथ दिन राराताल जान लागेको बताए ।

वैशाख १ गते प्रधानमन्त्री केपी शर्मा ओलीले रारामै केही विद्यार्थीलाई भर्ना गरेको, तर त्यहीका ७ वर्षीय पूर्णबहादुर कुलाल (जसको शारीरीक अपाङ्गता छ) विद्यालय जान नसकेको मिडियामार्फत सुनेपछि अपाङ्गता भएकालाई पनि सरकारले नागरिक ठानोस् र सेवा सुविधा तथा अवसर देओस् भन्ने विषयमा ध्यानाकर्षण गराउनु पनि आफ्नो उद्देश्य रहेको उनले बताए ।

कैलालीको लम्कीमा सिलाइकटाइ व्यवसाय गर्दै आएका रसाइलीले ४ वर्षको छदाँ नै खुट्टा गुमाएका थिए ।

जेठ ४ गते रारा जान भन्दै उनले साइकल यात्रा लम्कीबाट शुरु गरेका थिए । उनी लम्कीबाट सुर्खेत ३ दिनमा आइपुगेका हुन् । रारा पुगेर  फर्कन उनलाई कम्तिमा पनि १८ दिन लाग्ने उनको भनाइ छ ।

सुर्खेतमा रहुञ्जेल होटल व्यवसायी संघ सुर्खेतका अध्यक्ष तर्कबहादुर शाहीले खर्च बेहोर्नेछन् भने कालिकोट र मुगुका अध्यक्षहरूलाई समेत सहयोग गर्न आग्रह गर्ने भ्याली भ्यू होटलका सञ्चालक तर्कबहादुर शाही बताउँछन् ।