काठमाडौं, ८ जेठ -मलेसियास्थित नेपाली राजदूतावासमा कार्यरत एक कर्मचारी म्यानपावर व्यवसायी भएको तथ्य सार्वजनिक भएको छ ।

सवारी चालकको रूपमा मलेसियाको नेपाली दूतावासमा कार्यरत प्रविण प्रधान नेपालस्थित 'उत्सव एच आर सोल्युसन'का कार्यकारी निर्देशक रहेको पाइएको हो । उक्त म्यानपावर कम्पनी गौशालाको पिङ्गलास्थानमा अवस्थित छ । 

प्रधानले आफूलाई दूतावासको कर्मचारी बताउँदै मलेसियाका रोजगारदाता कम्पनीहरूमा आवश्यक पर्ने नेपाली कामदार सप्लाइ गर्ने काम गरिरहेका थिए । 

उनले आफैं मागपत्र ल्याउने, अनि त्यसलाई दूतावासबाट प्रमाणीकरण गराउने र अन्य म्यानपावरहरूको कामलाई वैधानिकता दिन आफू कार्यरत दूतावासमार्फत् पहल गर्ने गरेको खुल्न आएको छ ।

यस सम्बन्धमा आवश्यक छानबिन भइरहेको मलेसियास्थित नेपाली दूतावासले बताएको छ ।