काठमाडौं, १० जेठ – संसारमा युद्धको फरक रूप देख्न थालिएको छ । एक अमेरिकी अधिकारीले चीनमा असामान्य आवाज सुनेपछि दिमागमा चोट लागेको गुनासो गरेका छन् ।

यो सार्वजनिक भएपछि ट्रम्प प्रशासनले आफ्ना नागरिकहरूलाई यसबारेमा चेतावनी जारी गरेको छ । 

क्युबामा केही समयअघि अमेरिकी कूटनीतिक कर्मचारीहरूमाथि रहस्यमय सोनिक अट्याक अर्थात् ध्वनि आक्रमण गरिएको आरोपको याद यसले ताजा पारेको छ । उक्त घटनापछि अमेरिकाले आफ्ना अधिकारीहरूलाई स्वदेश फर्कन लगाएको थियो । 

यस्तो आक्रमणपछि सुन्न समस्या भएको, चक्कर आएको र आँखा नदेखिएको गुनासो अधिकारीहरूले गरेका थिए । 

चीनमा अमेरिकी दूतावासको प्रवक्ता जिनी लीले चीन र अमेरिकाका अधिकारीहरूले कर्मचारीको मस्तिष्कमा हल्का चोट लागेको विषयमा जाँच गरिरहेका छन् ।

चीनबाट अन्य यस्ता घटनाको जानकारी नआएको अमेरिकी अधिकारीहरूको भनाइ छ । 

चोट लागेका अमेरिकी कर्मचारी दक्षिणी चीनको ग्वाङ्जाउमा काम गरिरहेका थिए । अमेरिकी दूतावासले चीनमा बस्ने अमेरिकी नागरिकहरूलाई पठाएको एक इमेलमा असामान्य स्थितिको लक्षण वा देशमा यस्तो किसिमको अर्को
स्थितिको जानकारी नभएको लेखिएको छ । 

दूतावासले जारी गरेको सन्देशमा भनिएको छ, ‘चीनमा बस्दा अचम्मको आवाज वा दबाब अनुभव गर्नुभयो भने कहाँबाट आवाज आयो भनी बुझ्न थाल्नुभन्दा पहिले आवाज नआएको ठाउँतिर जानुहोला । अनि नजिकैको चिकित्सकसँग
सम्पर्क गर्नुहोला ।’

एजेन्सी