काठमाडौं, ११ जेठ – होटल ल्यान्डमार्कमा गत माघ पहिलो साता भएको सामूहिक बलात्कार घटनामा संलग्न फरार अभियुक्तविरुद्ध प्रहरीले ‘डिफ्युजन नोटिस’ जारी गरेको छ ।

प्रतिवादी रहेका तीन अभियुक्तविरुद्ध अन्तर्राष्ट्रिय प्रहरी संगठन (इन्टरपोल) मा बिहीबार ‘डिफ्युजन नोटिस’ जारी गरिएको हो । केन्द्रीय प्रहरी प्रवक्ता शैलेश थापाले फरार अभियुक्त विकास गौतम, दीपक श्रेष्ठ र रवि पौडेललाई पक्राउ गर्न डिफ्युजन नोटिस जारी गरिएको जानकारी दिए ।

घटनामा संलग्न मुख्य अभियुक्त भनिएका शैलेश कार्की जेल चलान भइसकेका छन् । जिल्ला अदालत काठमाडौंका न्यायाधीश भीष्मराज प्रसाईंको एकल इजलासले गत सोमबार कार्कीलाई थुनामा राखेर मुद्दाको सुनुवाइ अघि बढाउन आदेश दिएपछि उनलाई केन्द्रीय कारागार सुन्धारामा राखिएको छ, राजधानी दैनिकमा खबर छ  ।