सुर्खेत, १२ जेठ–  कर्णाली प्रदेश सरकारले आफ्नो अत्यन्तै महत्वपूर्ण समय ‘हनिमुन पिरीयड’ मनाएको छ । फागुन ३ गते कर्णाली प्रदेश सरकारले महेन्द्रबहादुर शाहीको मुख्यमन्त्रीत्वमा सरकार पाएको थियो । मुख्यमन्त्री शाही नेतृत्वको सरकार गठन भएको सय दिन पुरा भएको छ । सरकारले हनिमुन पिरीयड पार गरेपछि प्रतिपक्षी दलका नेता जीवन बहादुर शाहीले सरकार हनिमुन पिरीयड पार गर्दै गर्दा ‘हनि’मै अल्झिएको आरोप लगाए । उनले भने, ‘हनिमै अल्झिएपछि अरु के नै गर्न सकिन्छ र ?

कर्णालीमा सत्तापक्ष प्रतिपक्ष जस्तो भएको र आफूहरु सत्तापक्ष जस्तो भएको देखिएको उनको भनाइ छ । ‘संसदमा हामीले सरकारलाई सहयोग गरेका छौं ।’ नेता शाहीले भने, ‘उहाँहरुकै पक्षका सांसदहरु प्रतिपक्ष जस्तो देखिनु भएको छ ।’ सरकारले ठुला सपना देखाउने तर कार्यान्वयनमा लैजान नसकेको उनको आरोप छ । ‘कर्णाली रारा पर्यटन वर्ष आयोजना गरेर पाँच लाख पर्यटक भित्र्याउने घोषणा सरकारले गर्यो ।’ उनले भने, ‘तर पूर्वाधारको विकास नगरि त्याे कसरी सम्भव छ ?’ 

कर्णाली प्रदेश सरकारले बजेट पारीत गरेको  धेरे समय वितेपनि रातो किताब दिन नसकेको, प्रदेशको नाम कर्णाली भनेर गृह मन्त्रालयलाई बताउन नसकेको, ऐन कानून बनाउन ढिलाई गरेको आरोप लगाए ।

साविकको नेकपा एमालेका सचेतक गुलावजंग शाहले सरकार जटिलताबीच गठन भएकाले प्रगति कम भएको बताए । ‘केन्द्र र स्थानीय तहका संरचना थिए । तर प्रदेशका कुनै पनि संरचना छैनन्,’ उनले भने, ‘अब विस्तारै सरकारले गति लिनेमा म विश्वस्त छु ।’ सचेतक शाहले नयाँ संरचना निर्माण गर्नुपर्ने अभिभारा र जनताका तीव्र आकांक्षाका कारण सरकार ढिलो चलेको अनुभूति भएको भएपनि अब सरकारले कार्यविधि तय गरेर द्रुत गतिमा काम गर्ने अपेक्षा गरे ।

‘सरकारले बजेट ल्याए पनि कार्यान्वयनमा चुनौति देखिएको, विभिन्न ऐनहरु बनाउन लागेको, कानुनी अडचनका कारण सरकार दौडन नसकेको हो,’ सरकारको बचाउ गर्दै सचेतक शाहले लोकान्तरसँग भने, ‘अब केहि दिनमै सरकार दोडेको तपाई हामीले देख्न सक्छौं कि भन्ने अपेक्षा छ ।’ यद्यपि उनले सरकारले तीव्र गतिमा गर्नुपर्ने काम भने गर्न नसकेको उनको आरोप छ ।

पूर्व माओवादी केन्द्रका नेता विन्दमान विष्ट भने सरकार ६५ प्रतिशत नम्बरका साथ पास भएको बताउँछन । ‘सरकारले प्रदेश नामाकरण गरेको छ, राजधानी तोकेको छ, यद्यपी यो प्रदेशसभाबाट पास भएपनि यसको केहि श्रेय सरकारलाई पनि जान्छ ।’ सरकारका राम्रा कामहरु बताउँदै नेता विष्टले भने, ‘पर्यटनलाई प्राथमिकता दिई कर्णाली रारा महोत्सवबाट विश्वको ध्यान खिच्न सरकार ऐतिहासिक रुपमा सफल भएको छ ।’ उनले ऐन निर्माण गर्दा सबै पक्षसँग समझदारी कायम गर्दै अघि बढनु पनि सरकारको सफलता बताए ।

नेता विष्टले राम्रा कामहरु भएपनि सरकार भने अलि ढिला चलेको महसुस भएको बताए । ‘सरकारले जति समयमा जुन गतिमा कामहरु गर्नुपथ्र्यो, त्यो हुन नसकेको महसुस भएको छ ।’ उनले भने, ‘अर्को अथृमा भन्दा कानूनी जटिलताका कारण सरकार कछुवा गतिमा छ ।’