जनकपुर, १६ जेठ - प्रदेश नम्बर २ को सरकारले मुख्यमन्त्री तथा मन्त्रीपरिषद्को कार्यालयमा शहीद परिवारलाई रोजगारी दिएको छ ।

मधेश आन्दोलनमा शहीद भएका रामविवेक यादवकी धर्मपत्नी अनिलाकुमारी यादवलाई मुख्यमन्त्री लालबाबु राउतले मुख्यन्यायधिवक्ताको कार्यालयमा नियुक्ति दिएका हुन् ।

मुख्यमन्त्री राउतले शहीद परिवारलाई रोजगारी दिने घोषणा गरेअनुसार नै महोत्तरी जिल्लाको महोत्तरी गाउँपालिका वडा नम्बर २ महोत्तरी गाउँ निवासी अनिला यादवलाई कार्यालय सहयोगी पदमा करारमा रोजगारी दिएका हुन् ।

महोत्तरीको जलेश्वरमा तत्कालीन संयुक्त लोकतान्त्रिक मधेश मोर्चालगायतले गरेको 'चलुु जलेश्वर, भरु जलेश्वर' कार्यक्रममा प्रहरीले हस्तक्षेप गरी गोली चलाउँदा यादवको घटनास्थलमै मृत्यु भएको थियो ।

यता पीडित परिवारले उच्च अदालत जनकपुरमा जिल्ला प्रहरी कार्यालय महोत्तरी लगायतकोविरुद्धमा मुद्दा दिएको छ । अदालतको आदेश प्रहरी कार्यालयले नमानेपछि दिएको अपहेलना मुद्दामा भने अदालतले प्रहरी कार्यालय महोत्तरी र सरकारी वकिलको कार्यालय महोत्तरी मिसिल झिकाउन आदेश दिएको छ ।

शहीद यादव तत्कालीन मातृकाप्रसाद यादवको नेतृत्वमा रहेको नेकपा माओवादीको भातृ संगठन अखिल क्रान्तिकारी महोत्तरीका जिल्ला अध्यक्ष थिए ।