जनकपुरधाम, १७ जेठ –प्रदेश नम्बर २ को प्रदेशसभा भवन परिसरमा बुधबार राति फिल्मी शैलीमा एउटा दुर्घटना भयो । गुपचुप राखिएको यो दुर्घटनाका पीडित आफ्नो खुट्टा नै गुमाउने अवस्थामा पुगेका छन् भने दुर्घटना गराउने व्यक्ति (प्रदेशसभाकै कर्मचारी) प्रहरी हिरासतमा छन् ।

प्रदेशसभा सचिवालयमा कार्यरत शाखा अधिकृत अमरेन्द्र कुसियैतले गाडी सिक्ने क्रममा प्रदेश नम्बर २ का प्रदेश प्रमुख रत्नेश्वरलाल कायस्थका अंगरक्षक (पीएसओ) शिवजी देव सेर्मालाई फिल्मी शैलीमा ठक्कर दिएर गम्भीर घाइते बनाएका हुन् ।

सिरहाको सिरहा नगरपालिका वडा नम्बर ८ निवासी कुसियैतले चलाएको गाडीको ठक्करबाट गम्भीर घाइते भएका सेर्माको दायाँ खुट्टा नै काम नलाग्ने अवस्थामा पुगेको जिल्ला प्रहरी कार्यालय धनुषाका प्रहरी उपरीक्षक दीपेन्द्र शाहीले लोकान्तरलाई जानकारी दिए ।

‘गाडीको ठक्करबाट प्रहरी हवल्दार शर्माको दाहिने खुट्टाको पञ्जा पूर्ण रूपमा किचिएको छ,’ शाहीले भने, ‘जनकपुर अञ्चल अस्पतालमा उपचार सम्भव नभएपछि उहाँलाई लालितपुरस्थित बीएण्डबी अस्पताल पठाइएको छ ।’
सेर्मालाई एम्बुलेन्समार्फत राति नै केन्द्रीय राजधानीतर्फ लगिएको हो ।

इलामको दानाबारीका स्थायी बासिन्दा सेर्मा प्रदेश प्रमुख कायस्थको अंगरक्षकका रूपमा कार्यरत छन् ।

यसरी भयो दुर्घटना

बुधबार राति करीब सवा ८ बजेतिर प्रदेशसभाका मर्यादापालकहरूले मेसमा खाना खाने बेला भएको थियो । मर्यादापालकहरूको क्वार्टर रहेको भवनको बरण्डामा प्रदेश प्रमुख रत्नेश्वरलाल कायस्थका अंगरक्षक पीएसओ शिवजी देव शर्मा, प्रहरीका एक सई र केही मर्यादापालक कुर्सीमा बसेर मोबाइल चलाइरहेका थिए ।

त्यति नै बेला प्रदेशसभा सचिवालयमा कार्यरत शाखा अधिकृत अमरेन्द्र कुसियैतले भवन परिसरमा पार्किङ गरेर राखिएको बा २ च ६५० नम्बरको गाडी बाहिर निकाले । गाडी चलाउन नजान्ने कुसियैतले सिक्नका लागि गाडी निकालेका रहेछन् ।

गाडी अचानक हुत्तियो । उनले त्यसलाई नियन्त्रण गर्न सकेनन् । गाडी पीएसओ शर्मासहित केही व्यक्ति बसेर मेबाइल चलाइरहेको बरण्डातर्फ अघि बढ्यो । शर्माबाहेकका अन्य व्यक्ति भाग्न भ्याए । गाडी २/३ वटा सिंढी चढेर बरण्डामा पुगिसकेको थियो । गाडीले शर्माको खुट्टा पिल्लरमा च्याप्न भ्यायो ।

कुसियैतलाई बचाउन कर्मचारीको दबाब

प्रहरी हिरासतमा रहेका कुसियैतलाई बचाउन कर्मचारीहरूले प्रदेशसभा सचिवालयका सचिव दिवाकर पौडेललाई दबाब दिइरहेका छन् । सचिव पौडेलले समेत प्रहरी उपरीक्षक शाहीलाई फोन गरेर मुद्दा नचलाउन आग्रह गरेको एक कर्मचारीले जानकारी दिए ।

यद्यपि प्रहरी उपरीक्षक शाही भने जस्तोसुकै दबाब आए पनि कानूनअनुसार अघि बढ्ने बताउँछन् ।

‘कुसियैतमाथि कुन मुद्दा चलाउने भन्ने विषयमा निर्णय हुन बाँकी छ, एसपीसाब आएपछि सायद अंगभंग गराउने उद्योगअन्तर्गत मुद्दा चल्नसक्छ,’ डीएसपी शाहीले भने, ‘कुसियैतसँग सवारी चालक अनुमतिपत्र समेत नरहेको बुझिएको छ ।’

कुसियैतले गाडी सिक्ने क्रममा दुर्घटना गराएको प्रारम्भिक अनुसन्धानमा खुलेको उनले जानकारी दिए ।