बुटवल, २५ जेठ – ५ नम्बर प्रदेश सरकारले आर्थिक वर्ष २०७५\०७६ को नीति कार्यक्रम सार्वजनिक गरेको छ । प्रदेशसभाको आज बसेको बैठकमा सरकारका तर्फबाट प्रदेश प्रमुख उमाकान्त झाले सरकारको नीति कार्यक्रम संसदमा प्रस्तुत गरेका हुन् ।

‘समृद्ध प्रदेश खुशी जनता’ भन्ने नाराका ल्याइएको नीति कार्यक्रममा प्रदेश सरकारको साधनस्रोतको अधिकतम प्रयोग गरी आगामी ५ वर्षभित्र प्रदेशलाई, कृषि, उद्योग, पर्यटन र रोजगारीको केन्द्रको रूपमा  विकास गरी नमूना प्रदेशका स्थापित गर्ने नीति लिइएको छ । समग्र कृषि क्षेत्रको आधुनिकीकरण र व्यवसायीकरणका लागि युवा जनशक्ति खटाएर आगामी ५ वर्षभित्र प्रदेशलाई कृषिजन्य उत्पादनमा आत्मनिर्भर बनाई रोजगारीका लागि विदेश पलायन हुने युवा शक्तिलाई रोक्ने सरकारे योजना ल्याएको छ ।

त्यस्तै, एक गाउँ एक शीत भण्डार निर्माण गर्ने भएको छ । एक गाउँ एक उत्पादन र समूहमा आधारित कृषि व्यवसायलाई प्रोत्साहन गरिने छ । एक पालिका एक शीत भण्डार निर्माण गर्दै जाने नीतिमा छ । जसले गर्दा कृषकहरू कृषिप्रति आकर्षित हुनेछन् भन्ने सरकारले आशा छ ।

उत्पादकत्व वृद्धि गरी प्रदेशलाई कृषि उत्पादन निर्यात गर्न सक्ने अवस्थामा पुर्याउन जलवायु अनुकूल नमूना कृषि कार्यक्रम सञ्चालन गरी प्रदेशलाई कृषि उत्पादनमा अब्बब बनाउने उल्लेख छ । प्रदेशका १२ वटै जिल्लामा समान रूपमा विकास गरी प्रदेशलाई देशकै नमूना प्रदेशको विकास गर्ने योजना रहेको छ ।

नेपालगञ्जलाई औद्योगिक राजधानी बनाउने, भैरहवादेखि परासीसम्म र कपिलवस्तुको चन्द्रौटालाई औद्योगिक करिडोर र दाङ उपत्यकामा पनि औद्योगिक क्षेत्र निर्माणलाई जोड दिइने छ । पर्यटकीय गन्तव्यका लागि मोनो रेल, क्यानोयिङ, ट्रेकिङ, जैविक विविधता तथा विशेष सांस्कृतिक संग्रहालय, गार्डेन सिटी, हिल स्टेसन, केवलकार आदिको विस्तृत अध्ययन गरिने, २ वटा बच्चासम्मका लागि सुत्केरी पोषण भत्ता उपलब्ध गराउने नीति लिएको छ ।

प्रदेश सरकारले लुम्विनीसहित बुद्ध जन्मस्थललाई समेटेर एकीकृत पर्यटन विकास गर्ने, पर्यटकको बसाई बढाउने, भैरहवा परासी, चन्द्रौटा कृष्णनगर र दागमा औद्यागिक कोरिडोर स्थापना गर्ने नीति लिएको छ । प्रदेश सरकारले १ वर्षभित्रमा प्रदेशलाई साक्षर प्रदेश घोषणा गर्ने, ८४ वर्ष पुगेका ज्येष्ठ नागरिकलाई घरमा नैं स्वास्थ्य सुविधा उपलब्ध गराउने, न्यून आय भएका महिलालाई २ बच्चा सम्मका लागि सुत्केरी पोषण भत्ता उपलबध गराउने नीति लिएको छ ।

‘एक गाउँ एक पोखरी’ निर्माण, आर्थिक वर्ष २०७५\७६ देखि ‘प्रदेश स्मार्ट कृषि गाउँ कार्यक्रम’ सञ्चालन गर्ने, जगदिशपुर तालक्षेत्रमा ‘आगन्तुक चरा अध्ययन केन्द्र’ स्थापना गर्ने पनि नीति तथा कार्यक्रममा उल्लेख गरिएको छ । नेपालगञ्ज–कोहलपुर, घोराही–तुलसीपुर, बुटवल–भैरहवा तथा आसपासका क्षेत्रलाई समेटेर ३ महानगरको स्थापना गर्ने नीति लिएको छ ।

हेर्नुहोस् पूर्णपाठ :