किम र ट्रम्प भेटवार्ताका चार महत्त्वपूर्ण तथ्य

जेठ २९, २०७५

काठमाडौं, २९ जेठ – एउटा अनौठो क्षणमा ट्रम्प र किम ट्रम्पको कारतिर गए, ढोका खोले, भित्र हेरे र त्यसपछि होटलतिरै फर्किए । होटलमा उनीहरूले उभिएर फोटो खिचाए । 

उनीहरूले अनुवादक मात्र राखेर ४५ मिनेटसम्म कुराकानी गरे । यो एक बृहत्तर प्रक्रियाको पहिलो कदम मात्र हो । 

किम खुशी
किम र ट्रम्पले हात मिलाउँदा ट्रम्पले अनुहारमा हल्का मुस्कान ल्याउन लागेको जस्तो देखिन्थ्यो । किम चाहिँ हात मिलाउँदा मज्जैले हाँसे । त्यसपछि दुईजना वार्ताअघि फोटो खिचाउनतिर लागे । फोटो खिचाउँदा पनि किम मीठो गरी हाँसे । 

किमको हाँसो जायज पनि छ । तीन महिनाअघि उनी एक अलगथलग देशका नेता थिए । तर मंगलवार बिहान उनले संसारको सबभन्दा शक्तिशाली देशका नेतासँग हात मिलाए अनि उनीहरूका पछाडि अमेरिका र उत्तर कोरियाका झण्डाहरू थिए । यो दृश्य भव्य थियो ।

ट्रम्पको संयम
ट्रम्पले आफ्नो ट्रम्पपना दबाएको देखिन्थ्यो । उनी कसैसँग एकान्तवार्ता गर्दा जहिले पनि बढी उत्सुकता देखाउँछन् । उनले पत्रकार, राजनीतिकर्मी वा विश्वनेतासँग कुरा गर्दा यस्तै व्यवहार देखाउँछन् । 

तर किमसँगको भेटमा उनलाई शुरूआती हस्तमिलनका बेलामा र पहिलोचोटि सँगै फोटो खिचाएका बेलामा धेर उत्साहित नहुनू भनी सिकाइएको जस्तो देखिन्थ्यो । तर ट्रम्पले कसको सुन्ने ? किमले पत्रकारहरूलाई पहिलो टिप्पणी सकेपछि ट्रम्पले उनलाई बूढी औंला ठड्याए । 

बैठक सकिएपछि भएको लन्चपछि प्रतिक्रिया दिँदै ट्रम्पले बैठक गजबको भएको अनि आफूहरूबीच उत्कृष्ट सम्बन्ध कायम भएको बताए । 

एकान्तवार्ता देखावटी बढी
ट्रम्प र किमबीचको एकान्तवार्ता काममा भन्दा पनि देखावटीमा बढी केन्द्रित देखिन्थ्यो । त्यसो त ४५ मिनेटसम्म दुई नेताबीच कुराकानी हुनु भनेको लामै समय हो तर अनुवादकहरूमार्फत संवाद गर्नुपर्दा यो वार्ता समय खासै लामो हैन । 

शिखरवार्ताको पूर्वसन्ध्यामा ट्रम्पले यो बैठक भेटघाटमा मात्र सीमित नरहेर नीतिको गहन छलफलमा पुग्ने बताएका थिए । हुन पनि त्यस्तै भएको देखिन्थ्यो । ट्रम्प र किममुनिमा कूटनीतिज्ञहरूले एकखाले सम्झौतामा समझदारी बनाइसकेको देखिन्थ्यो । त्यसलै दुई शीर्ष नेताले त्यसैलाई व्यक्तिगत रूपमा पुष्टि गरेका हुन् । 

दुवैजना वार्ता सफल बनाउन उद्यत
हस्तमिलनका लागि दुई नेताहरू देखा परेको क्षणदेखि लन्चपछि क्यामराका अगाडि देखापरेसम्म दुवै नेताबीचको सम्बन्धमा न्यानोपन देखिन्थ्यो । ट्रम्पले किमसँग हात मिलाउँदा उनको हातको माथिल्लो भाग समाते । एक ठाउाबाट अर्को ठाउँमा जाँदा उनीहरूले कुराकानी गरे । बैठक शुरू हुनुअघि नै ट्रम्पले आफूहरूबीच गजबको छलफल हुने र यसमा भव्य सफलता प्राप्त गर्ने बताएका थिए । 

यो बैठक हुनुअघिदेखि नै ट्रम्पको व्यवहार उत्साहजनक थियो । एकचोटि त बैठक रद्द नै हुन्छ जस्तो देखिएका बेलामा पनि ट्रम्पले यो बैठक हुनैपर्ने भित्रभित्रै बताइरहेका थिए । 

ट्रम्प र किमलाई यो गजबको मञ्च हो भन्ने थाहा छ । दुवैजना राजनीतिक मञ्चमा प्रदर्शन गर्न रमाउँछन् । त्यसैले यसलाई उनीहरू गजबको बनाउन हरसम्भव प्रयास गरिरहेका छन् ।

सीएनएनमा प्रकाशित क्रिस सिलिजाको रिपोर्टको भावानुवाद
 


ADVERTISEMENT

जेठ २९, २०७५ मा प्रकाशित

प्रतिक्रिया दिनुहोस