‘टिलिक्क’ होटलमा बासी भात र गन्हाउने तरकारी !

जेठ ३०, २०७५

विराटनगर, ३० जेठ – खाना र नास्ताका लागि होटल रोज्नुपर्दा सबैले ‘टिलिक्क’ देखिने र सफा होटल रोज्छन् । तर, टिलिक्क देखिने होटलको भान्सामा पनि बासी भात र गन्हाउने तरकारी हुने गरेको पाइएको छ ।

विराटनगरका पत्रकारको टोलीले खाना र नास्ता होटलमा बासी भात र गन्हाउने तरकारी बिक्री हुने गरेको तथ्य फेला पारेका हुन् । जिल्ला वन कार्यालय मोरङले वैज्ञानिक वन व्यवस्थापनबारे जानकारी दिन पत्रकारलाई भ्रमणमा लैजाने क्रममा खाना खाँदा बासी भात र गन्हाउने तरकारी फेला परेको छ । विराटचोकमा रहेको मिलन स्वीट हाउसमा खाजा खाँदै गरेको अवस्थामा केही गन्हाएकोजस्तो लागेर हेर्दा आफूले खाँदै गरेको तरकारी बासी भेटिएको कान्तिपुर टेलिभिजनका पत्रकार महाप्रसाद खतिवडाले बताए । 


ADVERTISEMENT

उनले होटल सञ्चालकलाई त्यसमा बारेमा सोध्दा होटल सञ्चालकले उल्टै निहुँ खोजेको बताइएको छ । ‘मैले पकाएको हैन मलाई के थाहा ?’ भनेर होटल सञ्चालकले गैरजिम्मेवार जवाफ दिएका थिए । पत्रकारले प्रहरी बोलाउने बताएपछि उनी हच्किएर अघिल्लो दिनको आलु मिसाएर खुवाएको जवाफ दिएका थिए । राजमार्ग क्षेत्रमा सञ्चालनमा रहेका मिलन स्वीट हाउसजस्ता धेरै होटलले बासी खाजा र खाना खुवाउँदै आएको भएपनि अनुगमन नहुँदा समस्या ज्यूँका त्यूँ रहेको छ ।

राजमार्गका होटलमा अधिकांश ग्राहक नियमित हुँदैनन्, छोटा समयको लागि आउँछन् । त्यसैको फाइदा होटल सञ्चालकले उठाउने गरेको यात्रुहरू बताउँछन् । प्रायः लामो दुरीका सवारीसाधन आउने र होटलमा खाना र खाजा खुवाउने गर्छन् । अधिकांश राजमार्ग क्षेत्रका होटलले बासी र बचेका खानेकुरा खुवाउने गरेको गुनासो पटक–पटक आउने गरेको छ । बजार अनुगमन गरेर उपभोक्ता ठगिनबाट जोगाउने जिम्मेवारी ऐनले स्थानीय तहलाई दिएको भएपनि त्यसको प्रयोग भएको छैन ।

होटलमा हुने अनुगमनको सन्दर्भमा मोरङका प्रमुख जिल्ला अधिकारी रामप्रसाद आचार्यले पछिल्लो समय संरचनात्मक असरका कारण अनुगमनमा असर परेको बताए । विषयगत कार्यालयमा १–२ जना मात्र कर्मचारी हुँदा कहीँ अनुगमनमा निस्कन सक्ने अवस्था नरहेको उनले बताए । 

जेठ ३०, २०७५ मा प्रकाशित

प्रतिक्रिया दिनुहोस