जनस्वास्थ्यमा खेलवाड : स्वास्थ्य संस्थामा जनशक्ति नहुँदा उपकरण खिया लाग्दै

जेठ ३०, २०७५

धनगढी, ३० जेठ – महिनौंसम्म प्रयोगमा नआउँदा कैलालीको ४ वटा प्राथमिक स्वास्थ केन्द्रलाई उपलब्ध गरिएका यन्त्र उपकरण खिया लाग्न थालेका छन् ।

जिल्लाको उदासीपुर, भजनी, जोशीपुर र चौमाला प्राथमिक स्वास्थ्य केन्द्रलाई करोडौं रकम खर्चेर वितरण गरिएको अत्यावश्यक यन्त्र उपकरण प्रयोगविहीन भएर जीर्ण बनेका हुन् । स्वास्थ्य बीमा बोर्डले २०७३ माघमा १ करोड ८४ लाख रुपैयाँ खर्चेर ४ वटा प्राथमिक स्वास्थ्य केन्द्रलाई विभिन्न यन्त्र उपकरण वितरण गरेको थियो । तर, प्राथामिक स्वास्थ्य केन्द्रमा प्रयोग गर्ने जनशक्ति नहुँदा प्रयोगविहीन बनेको बोर्डका कैलाली जिल्ला प्रबन्धक नरेश चौधरीले जानकारी दिए ।


उनले भने, ‘स्वास्थ्य बीमा बोर्डले यन्त्र उपकरण त उपलब्ध गरायो । तर, सम्बन्धित निकायले जनशक्ति र तालिम उपलब्ध गराउन नसक्दा प्रयोगविहीन बनेका छन् । जुन कारण स्वास्थ्य बीमा कार्यक्रम अन्तर्गत उपलब्ध गराइने सेवा सुविधा ती स्वास्थ्य केन्द्रबाट अझैं उपलब्ध गराउन सकिएको छैन ।’ बोर्डका जिल्ला प्रबन्धक चौधरीका अनुसार ती स्वास्थ्य केन्द्रलाई १÷१ थान एक्स–रे मेसिन, भिडियो एक्स–रे मेसिन, इसीजी, अटो एनालाइजर, डेन्टल बेड, डेन्टल सेट, इएनपी सेट वितरण गरिएको थियो ।

जिल्लाको जोशीपुर प्राथमिक स्वास्थ्य केन्द्रले भने केही जनशक्तिको व्यवस्थापन गरी सञ्चालनको तयारीमा जुटेको जनाइएको छ । ‘अरु स्वास्थ्य केन्द्रमध्ये जोशीपुर स्वास्थ्य केन्द्रले एक्स–रे र डेन्टल सेवा सञ्चालनको लागि कर्मचारी भर्नाको प्रक्रिया शुरू गरेको छ,’ प्रबन्धक चौधरीले भने । उदासीपुर प्राथमिक स्वास्थ्य केन्द्रका प्रमुख तथा डाक्टर नारायण जोशीले आवश्यक जनशक्ति नहँदा बीमा बोर्डले उपलब्ध गराएको उपकरण प्रयोगमा नआएको स्पष्ट पारे ।

उनले वितरण गरिएको उपकरणमध्ये एक्स–रे र डेन्टल सम्बन्धी यन्त्र उपकरणहरू प्रयोगमा नआएको जानकारी दिए । तर, केही उपकरण भने प्रयोगमा आएको डाक्टर जोशी बताउँछन् । भवन अभाव झेलिरहेको उदासीपुर स्वास्थ्य केन्द्रलाई वितरण गरिएका केही उपकरण त्यतिकै फालिँदा कवाडमा परिणत भइरहेका छन् । फालिएका डेन्टल चेयरमा खिया लाग्नुको साथै कवाडमा परिणत भएको स्थानीयहरू बताउँछन् । सरकारले ग्रामीण क्षेत्र लक्षित गरी आफ्नो नीति तथा कार्यक्रम ल्याइएपनि कार्यान्वयनको पाटोमा भने सुधार हुन सकेको छैन । ग्रामिण भेगका जनता सामान्य स्वास्थ्य सेवाको लागि पनि सदरमुकाम धाउनुपर्ने बाध्यता रहँदै आएको छ ।

यसैबीच, ७ नम्बर प्रदेशको सामाजिक विकास मन्त्रालयले आउँदो आर्थिक वर्षदेखि ती स्वास्थ्य केन्द्रमा आवश्यक जनशक्ति व्यवस्थापन गरी सेवा सञ्चालन गर्ने जनाएको छ । सामाजिक विकास मन्त्री दीर्घ सोडारीले जनशक्ति व्यवस्थापन गरी प्रयोगविहीन उपकरण प्रयोगमा ल्याइने र स्वास्थ्य बीमा कार्यक्रमलाई पनि प्रभावकारी बनाइने आश्वासन दिए ।

जेठ ३०, २०७५ मा प्रकाशित

लखन चाैधरी

लखन चौधरी लोकान्तरका लागि प्रदेश नम्बर ७ का प्रतिनिधि हुन् । 

लेखकबाट थप...

प्रतिक्रिया दिनुहोस

ताजा समाचार