काठमाडौं, ३१ जेठ –प्रमुख प्रतिपक्षी दल नेपाली कांग्रेसले सम्पत्ति विवरण देखाएको नाममा सञ्चारमन्त्री गोकुल बास्कोटाले टेलिभिजन कार्यक्रम बन्द गर्न निर्देशन दिएको भन्दै आपत्ति जनाएको छ ।

सरकार असहिष्णु भएको भन्दै कांग्रेसले संसद छाडेर जनतामा जाने चेतावनी समेत दिएको छ ।

प्रतिनिधिसभाको बिहीवारको बैठकमा विनियोजन विधेयक माथिको छलफलमा बोल्दै कांग्रेस नेता मीनेन्द्र रिजालले सार्वजनिक प्रशारण सेवा बनाउन लागिएको नेपाल टेलिभिजनमा मन्त्रीको सम्पत्ति विवरण देखाउँदैमा कार्यक्रम बन्द गर्ने निर्णय आपत्तिपूर्ण भएको बताए ।

‘अहिलेका बलशाली मन्त्रीको अन्तर्वार्तामा पत्रकारले सम्पत्ति विवरण देखाए भन्दैमा कार्यक्रम बन्द हुन्छ ?’ पूर्व सञ्चारमन्त्री समेत रहेका रिजालले प्रश्न गरे ।

नेपाल टेलिभिजनबाट प्रशारण हुने कार्यक्रम ‘सिधा प्रश्न’ बन्द भएपछि मन्त्रीले कार्यक्रम बन्दै गराएको भन्दै आलोचना भइरहेको छ ।

सञ्चार माध्यम राजनीतिक दलको माध्यमबाट प्रभावित नहोस् भनेर नेपाल टेलिभिजन र रेडियो नेपाललाई गाभेर बेलायतको बीबीसीजस्तो संसद मातहत रहने सार्वजनिक प्रशारण संस्था बनाउने योजना आफ्नो कार्यकालमा ल्याएको उनले बताए ।

सरकार असहिष्णु बन्यो

कांग्रेस नेता रिजालले सरकार असहिष्णु भएको र हरेक मान्छेलाई तर्साउँदै हिँडेको आरोप पनि लगाए । दुईतिहाइका कारण असहिष्णु भएको सरकाले संविधानको भावनालाई हरेक ठाउँमा कुल्चिँदै गएको आरोप लगाए ।

‘सरकारलाई पनि नियम कानून र संविधानभन्दा बाहिर जाने छुट छैन, यो म गम्भीरताका साथ भन्छु,’ उनले भने, ‘हिजो सदनमा सभामुख र उपसभामुख फरक दलको हुने कुरा गरेका थियौँ, अहिले गलत व्याख्या गर्नुहुँदैन ।’ 

रिजालले संसदमा विपक्षका २० जना सांसदको अगाडि सत्तापक्षका ५५ जना सांसद भएपनि मतदातामा २० जनाको अगाडि २७ जना मात्र सत्तारुढ दलका भएको उनले बताए ।

सदनमा प्रतिपक्षले ठाउँ पाएन भने जनतामा जानुपर्ने अवस्था आउने भन्दै उनले सत्तालाई दुईतिहाइको दम्भ देखाउने काम नगर्न चुनौती दिए ।