अन्तरद्वन्द्वमा जितिन् प्रदेश सांसद झोवा, प्रदेशसभामा पहिलो पटक राखिन् धारणा

जेठ ३१, २०७५

सुर्खेत, ३१ जेठ – कर्णाली प्रदेशसभा सदस्य झोवा कामीले पहिलो पटक संसदमा धारणा राखेकी छन् ।

आफूलाई कमजोर ठानेर लामो समयसम्म अन्तरद्वन्द्वमा हारेकी सांसद कामीले हिम्मत बटुलेर प्रदेशसभामा जनताका कुरा राखेकी छन् । प्रदेश सभाको पहिलो अधिवेशनमा १ दिन पनि नबोलेकी भनेर यसअघि समाचार सार्वजनिक भएको थियो ।

पहिलो पटक सभामा बोलेकी झोवाले कर्णाली सरकारको नीति तथा कार्यक्रमबारे आफ्नो धारणा राख्दै रेलभन्दा पनि बिजुली र सुरुङभन्दा पनि सडकको विस्तार गर्न माग गरिन् ।

‘सडकै नपुगेको मुगुका लागि रेल आवश्यक छैन,’ उनले भनिन्, ‘बरु सरकारले गतिलो सडक बनाओस् ।’ सांसद झोवाले सरकारको नीति तथा कार्यक्रममा केबलकार वा अन्य महत्वाकांक्षी योजना समेटिएको बताउँदै सबैभन्दा पहिले सडक र खानेपानीको विस्तार गर्न सरकारलाई आग्रह गरिन् । भोटे भाषा बोल्ने गरेकी उनले नेपाली भाषामै मन्तव्य राखिन् ।

नीति तथा कार्यक्रममा भोटे समुदायको लागि कार्यक्रम नराखिनु दुःखद भएको उनले बताइन् ।

‘मर्दा र पर्दा चाहिने गुम्वा हो,’ उनले भनिन्, ‘त्यो बारेमा लेख्दा धर्म त लाग्दो हो ।’ संसदमा करीब ५ मिनेट बोलेकी झोवाले नीतिमा भाँगोको तेल बनाउने उल्लेख गर्नुभन्दा चिउरीको तेल बनाउने लेखेको भए राम्रो हुने बताइन् । उनले मुगुमा महिलामाथि समस्या भएकाले रोजगारी सिर्जना हुने काम बढी गर्नुुपर्ने बताइन् । सांसद झोवाले ढुक्कका साथ सम्बोधन गरेको देख्दा अरु सांसदले समेत कानेखुशी गरेका थिए ।

संसदमा प्रतिपक्षी दलका नेता जीवनबहादुर शाहीले उनलाई करीब २० दिनको निरन्तर अभ्यास गर्न लगाएको बताए । ‘पहिले संसदमा बोल्न उनले अप्ठ्यारो मानेकी थिइन्,’ उनले भने, ‘उनलाई कुनै पनि हालतमा बोल्नुपर्ने भनेर भनेको, बरु आफ्नो भाषामा बोल्न प्रेरित गरेकै कारण उनले बोलेकी हुन् ।’

आफूले ‘केन्द्रीय संसदमा सभामुखलाई दाजु भनेर सम्बोधन गरेको’ सुनेको भन्दै उनलाई हौसला दिएको बताए । नेता शाहीले भने, ‘आगामी दिनमा उनले थप सुधार गर्दै बोल्न सक्छिन् भन्नेमा आशावादी छु ।’

प्रदेश सांसद झोवा कामी–संसदमा एक शब्द बोल्न सकिनन्

 

जेठ ३१, २०७५ मा प्रकाशित

शेरबहादुर थापा

थापा लोकान्तरकालागि कर्णाली प्रदेशका प्रतिनिधि हुन् ।

लेखकबाट थप...

प्रतिक्रिया दिनुहोस