काठमाडौं, ४ असार - प्रधानमन्त्री केपी शर्मा ओलीले आफ्नो भारत भ्रमणपछि दुई देशबीचको सम्बन्ध सुदृढ भएको बताउनुभएको छ ।

आफ्नो आसन्न चीन भ्रमणबारे प्रतिनिधिसभा बैठकमा सोमबार जानकारी दिनेक्रममा प्रधानमन्त्रीले भारत भ्रमणको प्रसंग उठाउनुभएको हो ।

'भारत भ्रमणपछि विश्वासको सम्बन्ध सुदृढ भएको छ,' प्रधानमन्त्री ओलीले भन्नुभयो, 'विभिन्न लक्षणहरू देखिएका छन्, ईपीजी सफल हुनेमा आशावादीभन्दा विश्वस्त छु ।'

साथै उहाँले काठमाडौं-वीरगञ्ज रेलमार्गको अध्ययनको लागि टोली काठमाडौं आइपुगेको जानकारी दिनुभयो ।

'काठमाडौं-वीरगञ्ज रेल्वे लाइन अध्ययनका लागि टोली काठमाडौं आइपुगेको छ, अब सर्भे शुरु हुन्छ,' प्रधानमन्त्री ओलीले भन्नुभयो ।

यसैगरी आफ्नो भ्रमणबाट विराटनगर, जनकपुर, नेपालगञ्ज र महेन्द्रनगरबाट हवाइ रुट पनि लिएको प्रधानमन्त्री ओलीले जानकारी दिनुभयो । त्यसलाई सन्धिको रूप दिन भने बाँकी रहेको उहाँको भनाइ छ ।

यस्तै प्रधानमन्त्री ओलीले भारतीय प्रधानमन्त्री नरेन्द्र मोदी नेपाल आउँदा भारतीय सुरक्षाकर्मी आएको विषयमा भएको आलोचनाप्रति असन्तुष्टि जनाउनुभयो।

'हामी भारत जाँदा पनि युनिफर्ममै गच्छेअनुसार हाम्रो सेक्युरिटी गएको हुन्छ, भारतले त हामी सक्दैनौं र सेक्युरिटी ल्याउनुपर्छ ? भनेर भन्दैन,' प्रधानमन्त्री ओलीले भन्नुभयो, 'सेक्युरिटीमा यस्तो कुरा सामान्य हुन्छ ।'