धनगढी, ६ असार – कैलालीको गौरीगंगा नगरपालिकाले अनलाइन घरधुरी सर्वेक्षण कार्य शुरू गरेको छ ।

सर्वेक्षणबाट प्राप्त हुने वास्तविक तथ्याङ्कको आधारमा नगरवासीलाई सेवा प्रवाह गर्ने उद्देश्य नगरपालिकाले आजदेखि घरधुरी सर्वेक्षणको कार्य शुरू गरेको हो । सर्वेक्षणको लागि अत्याधुनिक मोवाइल एप्सको प्रयोग गरिएको छ । जसमा घर नम्बर राखेर नम्बरिङ समेत गरिएको छ ।

घर परिवारको संख्या, मोवाइल नम्बर, खेतबारी, पिउने पानी, तरकारीबाली, घरमा प्रयोग हुने इन्धन, चुलो बत्तिको स्रोत, शौचालय, घरायसी सरसफाइ, फोहोर व्यवस्थापनको शैली, घरको प्रकार, पारिवारिक आम्दानी र रोजगारीको अवस्था, खाद्यान्न आत्मनिर्भरताको अवस्था, कृषि योग्य जमिन, जमिनको स्वामित्व, पशुपालन, बैंकिङ कारोबार र क्रण, शैक्षिक स्थिति लगायत समग्रमा घर परिवारको आर्थिक, शैक्षिक, सामाजिक अवस्थाको यथार्थ विवरण संकलन भइरहेको छ ।

संकलन हुने तथ्याङ्कबाट नगरपलिकाले आफ्नो नीति तथा कार्यक्रम बनाउने वडा नम्बर ९ का वडा अध्यक्ष हरिप्रसाद तिवारीले बताए ।

आज वडा अध्यक्ष तिवारीको रोहबरमा वनखेत टोलबाट सर्वेक्षणको शुरू गरिएको थियो । कार्यक्रमको शुभारम्भ गर्दै अध्यक्ष तिवारीले नगरपालिकालाई उत्कृष्ट बनाउन र जनतालाई स्थानीय सरकारले प्रदान गर्ने सेवा सुविधाको निर्धारण गर्न सहयोग पुग्ने बताए । घर सर्वेक्षणबाट प्राप्त हुने विवरणबाट वस्ती, टोल, वडासहित समग्र नगरपालिकाको वास्तविक अवस्था थाहा पाउन सकिने हुँदा नगरपालिकालाई हरेक कार्यमा सहजता हुने उनको दावी छ ।