अर्जेन्टिनाले आजको म्याच जित्नैपर्ने, फ्रान्सलाई अर्को चरणमा पुग्ने मौका

असार ७, २०७५

काठमाडौं, ७ असार – फूटबल विश्वकपको आठौं दिन बिहीवार तीनवटा खेल हुँदैछन् । डेनमार्क र अस्ट्रेलियाबीच पौने ६ बजे, फ्रान्स र पेरुबीच पौने ९ बजे अनि अर्जेन्टिना र क्र्रोसियाबीच पौने १२ बजेदेखि प्रतिस्पर्धा हुँदैछ । 

डेनमार्कले अस्ट्रेलियालाई हराएमा अनि फ्रान्सले पेरुलाई पराजित गरेमा उनीहरू राउन्ड अफ १६ मा स्थान पक्का गर्नेछन् । अर्जेन्टिनाले चाहिँ प्रिक्वार्टरफाइनलमा पुग्ने हो भने जसरी भएपनि आज क्रोएसियालाई हराउनुपर्नेछ । 

त्यसो त अर्जेन्टिनाले सन् २००२ देखि अहिलेसम्मको विश्वकपमा समूह चरणमा एउटा खेल पनि हारेको छैन । अनि अर्जेन्टिना र क्रोएसियाले अहिलेसम्म चार खेल खेलेका छन् । त्यसमा अर्जेन्टिना दुई अनि क्रोएसिया एक खेलमा विजयी
भएको थियो । एउटा खेल बराबरीमा टुंगिएको थियो । सन् १९९८ को विश्वकपमा अर्जेन्टिनाले क्रोएसियालाई १–० ले हराएको थियो ।

अर्को प्रतिस्पर्धामा फ्रान्सले पेरुको सामना गर्दैछ । यसै वर्ष यी दुईबीच प्रतिस्पर्धा हुँदा पेरु १–० ले विजयी भएको थियो । पेरुले सन् १९७८ पछि फिफा विश्वकपमा सात म्याच खेलेको छ तर त्यसमा एउटा पनि जितेको छैन । 

आज २१ जुनमा फ्रान्सको गेम परेको छ । यो उसका लागि विश्वकपमा शुभ दिन हो । सन् १९८२ को विश्वकपमा २१ जुनमै उसले कुवेतलाई ४–१ ले हराएको थियो । अनि सन् १९८६ को विश्वकपमा क्वार्टरफाइनलमा उसले ब्राजिललाई हराएको थियो । 

चालीस वर्षअघि २१ जुनमा पेरुले विश्वकपमा सबभन्दा लज्जास्पद हार बेहोर्नुपरेको थियो । त्यतिखेर उसलाई अर्जेन्टिनाले ६–० ले हराएको थियो । 

फ्रान्सले दक्षिण अमेरिकी टोलीहरूसँग अहिलेसम्म १३ म्याच खेलेको छ । त्यसमा उसले चार जीत, पाँच हार र चार बराबरी खेलेको छ । तर सन् १९७८ मा अर्जेन्टिनासँग २–० ले हारेपछि ऊ अपराजेय रहेको छ । 

अर्को प्रतिस्पर्धामा अस्ट्रेलिया र डेनमार्क भिड्दैछन् । दुवैले अहिलेसम्म तीन खेल खेलेका छन् । त्यसमा डेनमार्क दुईमा अनि अस्ट्रेलिया एकमा विजयी भएको छ । तर यी तीनै मैत्री म्याच थिए । विश्वकपमा उनीहरूले कहिले पनि
एकअर्काविरुद्ध खेलेका छैनन् । अस्ट्रेलियाले लगातार पछिल्ला चार म्याच हारेको छ ।

एजेन्सी
 


ADVERTISEMENT

असार ७, २०७५ मा प्रकाशित

प्रतिक्रिया दिनुहोस

ताजा समाचार