धनगढी, ७ असार – ७ नम्बर प्रदेशका मुख्यमन्त्री त्रिलोचन भट्टले अन्तर्राष्ट्रिय योग दिवसको अवसरमा योग गरेका छन् ।

योग दिवसको उद्घाटन समारोहमा बोल्दै मुख्यमन्त्री भट्टले योगलाई प्रदेशभरि अभियानकै रुपमा सञ्चालन गरिने बताए । ‘प्रदेशका जनतालाई निरोगी बनाउन पनि योगलाई अभियानात्मक रुपमा सञ्चालन गरिने छ,’ उनले भने । हरेक मानवको पहिलो सम्पत्ति भनेकै स्वास्थ्य भएको र स्वस्थ रहन योग जरुरी रहेको उनले बताए ।

‘आफ्ना गलत आनीबानी र खानपानलाई अहिलेदेखि त्यागौ, तपाई–हामी स्वस्थ भए मात्रै प्रदेश स्वस्थ रहन्छ । स्वस्थ प्रदेशले समृद्धि र विकास पनि चाडो हुन्छ,’ उनले भने, ‘आफ्नो डाक्टर आफैं बन्नुपर्ने बेला आएको छ । यसका लागि हरेक दिन योगा गर्न सबैमा आह्वान गर्छु ।’

कार्यक्रममा बोल्दै सामाजिक विकास मन्त्री दीर्घ सोडारीले ७ नम्बर प्रदेशका स्वास्थ्य समस्या समाधानका लागि प्रदेश सरकार लागि परेको बताए । ‘विकट तथा दूरदराजका वस्तीलाई पनि स्वास्थ्य पहुँचमा ल्याउन सामाजिक विकास मन्त्रालय कटिवद्ध रहेको छ,’ उनले भने ।

योग दिवसको अवसरमा सामाजिक विकास मन्त्रालयले आज कार्यक्रमको आयोजना गरेको थियो । सरकारी, गैरसरकारी निकाय तथा सर्वसाधारणको उपस्थितिमा धनगढीको चौराहबाट विभिन्न योगमैत्री नारासहित शुरू भएको र्यालीले बजार परिक्रमा गरेको थियो । र्यालीका सहभागीले सामाजिक विकास मन्त्रालयको प्राङ्गणमा योगाभ्यास समेत गरेका थिए । योगाभ्यासमा प्रदेशका सबै मन्त्रीको सहभागिता थियो ।