पर्सा, ९ असार – वीरगन्जको अलौंमा निर्माण भएको एकीकृत चेकजाँच चौकी (आइसीपी) को मुख्य भवनमा चुहिन थालेपछि भन्सार कर्मचारीलाई काम गर्न समस्या भएको छ । 

हस्तान्तरण भएको ३ महिना नपुग्दै भवनको छत चर्किएर वर्षाको पानी चुहिन थालेपछि काम गर्न कर्मचारीलाई समस्या भएको हो । भवन निर्माणको जिम्मा लिएको भारतीय कम्पनी केएस स्फटनेट सोलुसन प्रालिले गुणस्तरीय निर्माण नगरेको कारण आइसीपीको मुख्य भवन र गोदाम सामान्य वर्षामै चुहिन थालेकोे भन्सारका कर्मचारीले गुनासो गरेका छन् । ४÷५ दिन अगाडि भएको सामान्य वर्षा हुँदा मुख्य भवन र गोदाममा पानी चुहिएको हो । 

मुख्य भवन र गोदाममा पानी चुहिन थालेपछि काम गर्न र मालसामान भण्डारण गर्न समस्या भएको आइसिपी व्यवस्थापनको जिम्मा पाएको इटरमोडेल आइसीपी कार्यालयका प्रमुख हेमेन्द्र मोहन शाहीले जानकारी दिए । उनले अहिले देखिएको समस्यालाई समाधान गर्न केएस स्फटनेट सोलुसन प्रालिका कर्मचारीलाई भनिएपनि समस्या यथावत् नै रहेको बताए ।

यसै विषयमा सोलुसन प्रालिका परियोजना प्रबन्धक सुभाषचन्द्र दाससँग बुझ्दा उनले भवनको छत र गोदाममा देखिएका समस्यालाई चाँडै समाधान गरिने बताए । निर्माण कार्य गुणस्तरीय भएपनि परियोजनाको डिजाइनमा कमजोरी रहेका कारण पानी चुहिने समस्या देखिएको उनले दावी गरे । 

आइसीपीको मुख्य भवन लगायत गोदाम निर्माणमा भएको लापरवाहीबारे आइसीपी निर्माण कार्यको रेखदेखको जिम्मा पाएका शहरी विकास तथा भवन डिभिजन कार्यालय पर्साका प्रमुख सुरेश वाग्लेसँग बुझ्दा उनले निर्माण कार्य तथा अनुगमनको सम्पूर्ण जिम्मा भारतीय पक्षलाई नै भएको र नेपाली कार्यालयलाई भूिमकाविहीन बनाइएका कारण समस्या देखापरेको तर्क गरे । आइसीपीको भवन निर्माण गर्दा गुणस्तरीयतालाई गम्भीतापूर्वक नलिएका कारण ३ महिना नबित्दै चुहिने समस्या देखा परेको उनको भनाइ रहेको छ । 

निर्माण कार्यको अनुगमन तथा गुणस्तरको परीक्षणसमेत भारतीय पक्षले नै गरेकाले हाल देखिएको समस्याको मुख्य दोषी भारतीय पक्ष नै भएको कार्यालय प्रमुख वाग्लेको ठम्याइ छ । १ अर्ब ३९ करोड रुपैयाँको लगानी भएको आइसीपी निर्धारित समयभन्दा ५ वर्ष ढिलो निर्माण सम्पन्न भएको थियो । गएको चैत ११ गते नेपाल सरकारलाई भारतीय पक्षले विधिवत्रुपमा आइसिपीलाई हस्तान्तरण गरेको थियो । 

आइसीपी हस्तान्तरण गर्दा निर्माण गरिएको भवन, गोदामलगायतका पूर्वाधार मापदण्ड अनुसार भए–नभएकोबारे कुनै अनुगमन नगरिएको आइसीपीकै कर्मचारीको भनाइ रहेको छ ।