चितवन, १० असार -नेपाली कांग्रेसका सभापति शेरबहादुर देउवा पर्यटकीय नगरी सौराहामा आराम गरिरहेका छन् । 

नेपाली कांग्रेसका जिल्ला सभापतिहरुको हेटौँडामा सम्पन्न भेलापछि उनी गत शुक्रबारदेखि सौराहास्थित होटल सेभेन स्टारमा बसिरहेका छन् । उनका निजी सचिव भानु देउवाका अनुसार स्थानीय नेता र कार्यकर्ता कसैसँग पनि उनले भेटघाट गरेका छैनन् ।

जिल्ला सभापति भेलामा पार्टीभित्रकै अन्य समूहबाट पार्टी नेतृत्वको चर्को आलोचना भएको थियो । तनावमा रहेका ठानिएका पार्टी सभापति देउवा तनाव कम गर्न एक्लै आराम गरिरहेको बताइएको छ । प्रदेश सांसद मिलनबाबु श्रेष्ठका अनुसार देउवा आराम गर्नकै लागि सौराहामा बसेका हुन् । 

शनिबार काठमाडौँ फर्किने भनिए पनि उनी फर्किएनन् ।

यसअघि गत चैतमा पनि देउवा सौरहा अाइपुगेका थिए । त्यतिबेला जंगल सफारीमा गैंडा देखेर उत्साहित बनेका देउवा बाघ हेर्न नपाएपछि 'फेरि आउँछु' भन्दै फर्किएका थिए ।