काठमाडौं, १० असार – काठमाडौं महानगरपालिकाले आर्थिक वर्ष २०७५/७६ को लागि १३ अर्ब २ करोड १२ लाख ३७ हजार रुपैयाँको बजेट प्रस्तुत गरेको छ । 

कामपाले आज आयोजना गरेको नगरसभाको तेस्रो अधिवेशनमा उपप्रमुख हरीप्रभा खड्गी (श्रेष्ठ) ले उक्त बजेट प्रस्तुत गरेकी हुन् । बजेटको स्रोतमा आन्तरिक आयतर्फ ४ अर्ब ९० करोड २१ लाख ५७ हजार, बाह्य स्रोतबाट ५ अर्ब १९ करोड र अन्य स्रोतबाट १ अर्ब ४ करोड ११ लाख अनुमान गरिएको छ । 

त्यसैगरी, वडास्तरमा पूर्वाधार निर्माणमा ३ अर्ब ६ करोड २५ लाख, कार्यालय सञ्चालन र प्रशासनिक खर्चका लागि १ अर्ब ९३ करोड, शिक्षामा १ अर्ब १० करोड ४६ लाख र हनुमानढोका–स्वयम्भू जोड्ने पदमार्ग निर्माण र ढुंगेधारा संरक्षणमा ५१ करोड ६७ लाख रुपैयाँ विनियोजन गरिएको छ । 

कामपाले भवन निर्माण र सवारी सधान तथा अन्य सम्पत्ति खरिदमा २ अर्ब ३६ करोड १ लाख, मोनोरेल, विद्युतीय बस, फ्लाइ स्काई ब्रिज, सार्वजनिक शौचालयलगायतको पूर्वसम्भाव्यता अध्ययन तथा विस्तृत परियोजना प्रतिवेदन (डीपीआर) तयार गर्न १५ करोड १० लाख रुपैयाँ बजेट छुट्याइएको छ । 

चालू आवको तुलनामा आगामी आवको बजेट १ अर्वले बढी हो । कामपाले चालू आव २०७४÷७५ का लागि १२ अर्ब ८७ करोड ८९ लाख ४७ हजार रुपैयाँ विनियोजन गरेको थियो । चालू आवको वैशाख मसान्तसम्ममा ३ अर्ब २८ करोड ८४ लाख ७ हजार रुपैयाँ खर्च गरेको छ । जुन अनुमानित खर्चको २५ दशमलव ५३ प्रतिशत हो । 

त्यसैगरी, चालू आवमा १२ अर्ब ८७ करोड ९४ लाख राजस्व संकलनको लक्ष्य राखेकामा आन्तरिकतर्फ ५ अर्ब ४८ करोड १६ लाख र बाह्य स्रोतबाट ७ अर्ब ३९ करोड ७८ लाख रुपैयाँ असुली गर्ने लक्ष्य लिएको थियो । चालु आवको वैशाख मसान्तसम्ममा आन्तरिक आयतर्फ १ अर्ब ५९ करोड ७३ लाख र बाह्यतर्फ २ अर्ब ७४ करोड ५१ लाख गरी कूल ४ अर्ब ३४ करोड २४ लाख राजस्व असुल गरिएको छ । यो अनुमानित आम्दानीको ४२ दशमलव २७ प्रतिशत हो । 

चालू आवमा घरबहाल कर असुल गर्ने नीति स्पष्ट नभएको, ठूला करदातालाई करको दायरामा ल्याउन नसकेको, स्थानीय तहको कार्यक्षेत्र संविधानले स्पष्ट गरेपनि आवश्यक कानून समयमै तर्जुमा हुन नसकेको र करदाताको यथार्थ विवरण संकलन गर्न नसकेको कारणले गर्दा अपेक्षित राजश्व हासिल गर्न नसकिएको बताइएको छ ।