सुर्खेत, २१ असार – कर्णाली प्रदेश सभाको बैठक साउन महिनादेखि आफ्नै सभाहलमा बस्ने भएको छ ।

हाल क्षेत्रीय सिँचाइको हलमा संसदका बैठक चलिरहेका छन् भने संसद सचिवालय शैक्षिक तालिम केन्द्रको भवनमा राखिएको छ । संसद बैठकका लागि शैक्षिक तालिम केन्द्रको भवन मर्मत गरेर तयार गरिँदैछ । गत चैत १२ गते सहरी विकास तथा भवन निर्माण डिभिजन कार्यालय सुर्खेतले १ करोड रुपैयाँ लागतमा मर्मतको काम गरिरहेको छ ।

साउनभित्रै बैठक सुचारु गराउने योजनासहित काम भइरहेको कर्णाली प्रदेशका मुख्यमन्त्री महेन्द्रबहादुर शाहीले बताए । ‘हामी यो साउनबाटै संसद बैठक सञ्चालन गर्न चाहन्छौं,’ उनले भने, ‘गुणस्तरीय काम होस् भन्दै म निरन्तर मर्मत सम्भार चलिरहेको ठाउँमा आइरहेको छु ।’

काठको काम गर्दै आएका युवालाई राम्ररी काम गर्न निर्देशन दिइरहेका मुख्यमन्त्री शाहीले कमसल खालका काम नगर्न चेतावनी दिए । ‘हामीले कामको गुणस्तरमा ध्यान दिनुपर्ने बेला आएको छ,’ उनले भने, ‘विदेशी इन्जिनियरले राम्रो गर्ने हाम्राले किन राम्रो नगर्ने ?’

सभामुख राजबहादुर शाहीले आगामी २० दिनसम्म संसद भवन तयार हुने बताए । ‘अबको २० दिनमा हामी यहीँ बैठक बस्ने सम्भावना अत्याधिक छ,’ सभामुख शाहीले भने, ‘कार्पेट बिच्छाउन, कुर्सी मिलाउन र साउण्ड सिस्टम जडान गर्न मात्रै बाँकी रहेको छ ।’ साउण्ड सिस्टमबाहेक सबै सामान आइसकेकाले अब धेरै ढिलो नहुने उनले बताए ।