कृष्णप्रसाद अधिकारीका हत्या अाराेपित माओवादी कार्यकर्ता जेल चलान

असार २४, २०७५

माओवादी सशस्त्र युद्धका बेला गोरखा फुजेलका कृष्णप्रसाद अधिकिारको हत्यामा संलग्न रहेको आरोप लागेका माओवादी कार्यकर्ता जेल चलान भएका छन् ।  

माओवादी युद्धकालमा हत्या गरिएका गोरखाका फुजेलका अधिकारीको हत्यामा संलग्न भनिएका माओवादी कार्यकर्ता छबिलाल पौडेललाई सर्वोच्च अदालतले आइतवार कारागार चलान गरेको हो । 


ADVERTISEMENT

पौडेल आइतवार आफैं सर्वोच्च अदालतमा उपस्थित भएका थिए । सर्वोच्च अदालतले पौडेललाई मुद्दाको पुर्पक्षका लागि डिल्लीबजार कारागार चलान गरेको हो । 

अधिकारीको हत्यामा संलग्न रहेको आरोप लागेका पौडेल यसअघि जिल्ला अदालत चितवनको ४ वैशाख २०७१ को आदेशअनुसार धरौटीमा रिहा भएका थिए । 

चितवन जिल्ला अदालतले पौडेललाई धरौटीमा रिहा गर्न दिएको आदेश र सो आदेशलाई सदर गर्नेसम्बन्धमा उच्च अदालत हेटौंडाले ३० असार २०७२ मा जारी गरेको आदेश मिलेको नदेखिँदा सर्वोच्च अदालतले ‘अन्यथा प्रमाणित नभएसम्म’ पौडेलको हकमा जारी भएको आदेश बदर गरेको थियाे । 

सर्वोच्च अदालतले पछि प्रमाण बुझ्दै जाँदा ठहरे बमोजिम हुने भन्दै ६ पुस २०७२ मा पौडेललाई मुद्दाको पुर्पक्षका लागि थुनामा पठाउने आदेश जारी गरेको थियो । 

सर्वोच्चले जारी गरेको आदेश कार्यान्वयन नभएको भन्दै मृतक कृष्णप्रसाद अधिकारीकी आमा गंगामाया गत जेठ १५ गतेदेखि वीर अस्पतालमा आमरण अनशनमा छिन् । 

छोराको हत्यामा संलग्नलाई कारबाहीको माग गर्दै अनशनमा बसेकै बेला मृतक कृष्णप्रसादका पिता नन्दप्रसा अधिकारीको निधन भएको थियो । 

सर्वोच्चको सोही आदेशअनुसार थुनामा जान पाउँ भन्ने पत्रसहित ६८ वर्षीय पौडेल आइतवार अदालतमा उपस्थित भएका थिए । उपस्थित भएलगत्तै उनलाई डिल्लीबजार कारागार चलान गरिएको हो । 
 



 

 

असार २४, २०७५ मा प्रकाशित

प्रतिक्रिया दिनुहोस