काठमाडौं –संवैधानिक परिषदद्वारा सर्वोच्च अदालतको प्रधानन्यायाधीशमा सिफारिश कामु प्रधानन्ययाधीश दीपकराज जोशीको नाममा सुनुवाइ प्रक्रिया अगाडि बढाउन संसदीय सुनुवाइ विशेष समितिको बैठक मंगलवार बस्दैछ । 

सोमवारमात्र पूर्णता पाएको समितिको बैठक संसद सचिवालय सिंहदरबारमा बस्न लागेको हो । सभापतिको चयन भइनसकेका कारण बैठकको अध्यक्षता जेष्ठ सदस्य लक्ष्मणलाल कर्णले गर्नेछन् ।

समितिमा प्रतिनिधिसभाका १२ र राष्ट्रिय सभाका ३ सदस्य छन् ।

समितिको पहिलो बैठकमा संवैधानिक परिषद्को पत्रअनुसार कामु प्रधानन्यायाधीश जोशीको सुनुवाइका लागि उजुरी आह्वान गर्ने तयारी छ ।

संसद नियमावलीमा बहुमत सदस्यले अनुमोदन गर्ने र दुईतिहाइबाट अस्वीकृत गर्ने प्रावधान छ ।

संसदीय सुनुवाई समिति गठन हुन नसक्दा कामु प्रधानन्यायाधीशको सुनुवाइ हुन सकेको थिएन । संसदीय समितिले अनुमोदन गरेपछि मात्र राष्ट्रपतिले प्रधानन्यायाधीश नियुक्त गर्ने बाटो खुल्नेछ ।

संवैधानिक परिषद्ले जेठ २९ गते जोशीको नाम सर्वसम्मतिले सुनुवाइ समितिमा पठाएको थियो ।