काठमाडौं– सन् १९९८ को विश्वविजेता फ्रान्स फेरि एकपटक उपाधि नजिक पुगेको छ ।  मंगलबार मध्यराती सम्पन्न सेमिफाइनल खेलमा  चिरपरिचित प्रतिद्धन्द्धी बेल्जियमलाई १–०ले हराउँदै फ्रान्स विश्वकपको फाइनलमा प्रवेश गरेको हो । २० वर्षअघि फ्रान्स ब्राजिललाई ३–० गोल अन्तरले हराउँदै विश्व च्याम्पियन बनेको थियो । त्यसपछि सन् २००६ मा पनि फ्रान्स फाइनलमा पुगेको भएपनि इटालीसँग पराजित बन्न पुगेको थियो । 

सेन्ट पिटर्सबर्गस्थित क्रेस्टोभस्काई रंगशालामा भएको निकै रोमाञ्चक खेलको ५१ औं मिनेटमा फा्रन्सका सामुएल उमतितिले हानेको गोल नै निर्णायक बन्यो । उनले डिबक्सभित्रबाट हानेको हेडले जाली चुम्न पुग्यो । 
यसअघि खेलको पहिलो हाफ दुबै टोलीले गोलरहित बराबरी खेलेका थिए ।

यद्यपी पहिलो हाफमा दुबै टोलीले गोल गर्ने केहि सुन्दर मौका गुमाउन पुगेको थियो । 

५१ औं मिनेटमा सामुएलको गोल पछि डिफेन्स खेलेको फ्रान्सको पोस्टमा बेल्जियमका खेलाडिले एकपछि अर्को प्रहार गरेपनि गोल हुन सकेन । १–० गोलको हारसँगै बेल्जियम सेमिफाइनबाटै घर फर्किएको छ । 
फ्रान्सले अब इङ्ल्याण्ड र क्रोएशियाबीचको विजेतासँग फाइनल खेल्नेछ  ।  

  भौगोलिक सिमाना जोडिएका फ्रान्स र बेल्जियम यसअघि ७४ पटक एकअर्कासँग भिडेका थिए ।  

७४ भेटमध्ये ३० भेटमा बेल्जियमले बाजी मार्दा २४ पटक फ्रान्स विजयी भएको थियो भने बाँकी खेल बराबरीमा टुंगिएका थिए । 

जारी विश्वकपकै कुरा गर्दा  बेल्जियमले सेमिफाइनलमा प्रवेश गर्दासम्म शतप्रतिशत जीत दर्ता गरेको थियो भने फ्रान्सले समूह चरणमा एक खेल बराबरी खेलेको थियो । 

क्वार्टरफाइनलमा फ्रान्सले उरुग्वे तथा बेल्जियमले ब्राजिललाई पराजित गरेको थियो  भने बेल्जियमले उपाधिको प्रबल दाबेदार मानिएको दक्षिण अमेरिकी पावरहाउस ब्राजिललाई पराजित गरेको थियो । 

स्टार खेलाडीहरूले भरिएको बेल्जियम पहिलो पटक विश्वकप उचाल्ने लक्ष्यमा रहेपनि फ्रान्ससँग हारेसँगै सपना चकनाचुर बन्न पुगेको छ ।