काठमाडौं– काठमाडौंको अति व्यस्त बजार न्युरोडका विभिन्न क्षेत्रमा पार्किङका विषयमा सरकार र व्यवसायीबीच मतभेद सृजना हुँदा व्यापार प्रभावित भएको छ ।

न्युरोडका खिचापोखरी, पाको, बटु, धर्मपथ, गुच्चा लगायतका क्षेत्रमा व्यवस्थित पार्किङ सुविधा नहुँदा समस्या सृजना भएको हो । सो क्षेत्रमा व्यवस्थित पार्किङ नभएका कारण सडक किनारामै सवारी साधन, मोटरसाइकल पार्किङ गर्ने गरिन्छ । पछिल्लो समय सो क्षेत्रको बढ्दो भिडभाडसँगै महानगरीय ट्राफिक प्रहरी र काठमाडौं महानगरपालिकाले सडक किनारामा पार्किङमा कडाइ गर्दा झण्डै ६० प्रतिशत व्यवसाय घटेको व्यापारीहरुको दाबी छ ।

पाको विकास समितिका सदस्य समेत रहेका पाको बजारका मोबाइल पसल सञ्चालक तथा स्थानीय मनोज मानन्धरले सरकारले विकल्प र समय नदिइकन पक्षपाती तरिकाले कडाइ र कारबाही गर्न थालेको बताए । उनले महानगर प्रहरी र ट्राफिकले बजारका हिसाबले बार्गेनिङ गर्ने तर नमिलेको ठाउँमा कारबाही गर्ने गरेको आरोप लगाए । 

उनले भने, ‘महानगर र ट्राफिकसँगको सल्लाहमा दुई लाइनमा व्यवस्थित पार्किङ गर्ने बजार पनि छन् । तर एकाएक मनोमानी कारबाही गर्ने गरिन्छ । कतै गरिन्छ कतै गरिँदैन । विकल्पसहित पार्किङ व्यवस्थापन गर्नैपर्नेमा हामी सहमत छौं तर मनलाग्दी तरिका ठिक भएन ।’

यता काठमाडौं महानगरपालिकाले व्यापारीहरुले आफ्नो व्यापारका लागि पार्किङको सुविधा राख्नुपर्ने तर्क गरेको छ । महानगरपालिका प्रवक्ता ज्ञानेन्द्र कार्कीले व्यवसायीहरुले आफ्नो व्यवसायका लागि पार्किङको व्यवस्था गर्नुपर्ने हुँदा महानगरपालिकाको नीति गलत नभएको तर्क गरे ।

उनका अनुसार पुराना अव्यवस्थित बजारलाई ध्यानमा राख्दै महानगरपालिकाले आगामी आर्थिक वर्षमा विभिन्न ८३ स्थानमा पार्किङ स्थल निर्माणका लागि बोलपत्र आह्वान गर्ने तयारी गरिरहेको जानकारी दिए । कार्कीले भने, ‘व्यवसायीहरुले आफ्नो व्यवसायका लागि पार्किङको व्यवस्था त गर्नैपर्छ, फुटपाथमा राखेका मोटरसाइकललाई हामीले जरिवाना गर्नुपर्ने नीति लिएका छौं । योसँगै यही कुरालाई मध्यनजर गर्दै हामीले आगामी आर्थिक वर्षको शुरुवातमै ८३ वटा स्थानमा पार्किङ स्थल निर्माणका लागि टेण्डर आह्वान गर्ने तयारीमा छौं ।’

यस्तै सडक सुरक्षा तथा व्यवस्थापनको प्रमुख जिम्मेवार ट्राफिक प्रहरीले पनि महानगरपािलकासँग समन्वयमा न्युरोडका सडक व्यवस्थापनका लागि लागिरहेको जनाएको छ । प्रहरी वरिष्ठ उपरीक्षक (एसएसपी) बसन्त कुमार पन्तले न्युरोड क्षेत्र अति व्यस्त बजार भएकाले यो क्षेत्रमा व्यवस्थित पार्किङ हुनुपर्नेमा जोड दिँदै महानगरको समन्वयमा काम गरिरहेको बताएका छन् ।  

पन्तले भने, ‘बिगतकै ढंगले चलिरहेको थियो तर भिडभाडसँगै अस्तव्यवस्त बन्न थालेपछि हामीले सडक सुरक्षाका लागि काम गर्न लागेका हौं । अहिले निशेध गरेको ठाउँ फुटपाथ र सडकमा पार्किङ गरेको पाइए महानगरले जरिवाना तिराउँछ । हामीले सवारी व्यवस्थित गर्नका लागि सहयोग गरिरहेका छौं ।’