काठमाडौं – असार ९ गते थाइल्यान्डको अन्डर–१६ फूटबल टोलीका १२ खेलाडीहरूले आफ्ना प्रशिक्षकका साथ गुफामा पस्दा धेरै दिनसम्म फसिएला भनी सोचेकै थिएनन् । 

तर उनीहरू त्यहाँ १८ दिनसम्म फसे र संसारभरिको ध्यान उनीहरूमा एकत्रित भयो । मंगलवार सबैलाई सुरक्षित बाहिर ल्याइयो । 

एघारदेखि १६ वर्ष उमेरका १२ किशोरहरू आफ्ना प्रशिक्षकका साथ फूटबल अभ्यासपछि उत्तरी थाइल्यान्डमा रहेको थाम लुआङ गुफा पुगेका थिए । उनीहरू गुफामा पसेपछि भारी बर्खाका कारण बाढी आयो र उनीहरू गुफाको झन् झन् भित्र गए । उनीहरू चार किलोमिटर भित्र पुगेछन् । 

असार १८ गते साउथ एन्ड मिड वेल्स उद्धार टोलीका सदस्य रिचर्ड स्ट्यानन र जोन भोलेन्थनले गुफामा किशोरहरूलाई खोजे । यी सबै किशोरहरू भोक लागेका कारण कमजोर देखिन्थे । गोताखोरहरूलाई देखेपछि किशोरहरूको अनुहारमा मुस्कान आयो । 

शुरूमा त किशोरहरूलाई मनसून सकिएपछि मात्र गुफाबाट बाहिर ल्याउन सकिने बताइएको थियो । तर भारी बर्खा भइरहेपछि गुफामा पानी भरिएको भरियै हुने देखियो । 

गुफामा कार्बनडाइअक्साइडको मात्रा पनि लगातार बढिरहेको थियो अनि अक्सिजनको स्तर घटिरहेको थियो । यसो हुँदा त्यहाँ फसेका किशोरहरूको मृत्यु हुने सम्भावना पनि रहन्थ्यो । त्यसैले असार २४ गते उद्धारकर्ताहरूले गर वा मरको
स्थितिलाई मूल्यांकन गर्दै उद्धार अभियान शुरू गरे ।

स्वास्थ्य अधिकारीहरूका अनुसार, सबै किशोरको स्वास्थ्य ठीक छ । उनीहरूलाई ज्वरो आएको छैन तर उनीहरू सात दिनसम्म अस्पतालमा चिकित्सकहरूको निगरानीमा रहन्छन् । आइतवार निकालिएका चार किशोरहरूको शरीरको
तापक्रम एकदम कम थियो र दुईजनालाई फोक्सोमा संक्रमणको आशंका छ । 

दोस्रो चरणमा उद्धार गरिएका किशोरहरूमध्ये एकजनाको मुटुको ढुकढुकी गति कम छ तर उपचारले उसको स्थितिमा सुधार आएको छ । अहिले चिकित्सकहरू गुफामा हुनसक्ने अन्य रोगको परीक्षण गरिरहेका छन् । 

यो सर्च अपरेसनका प्रमुखले उद्धारकर्मको प्रयास गर्नेलाई संयुक्त राष्ट्र टीम संज्ञा दिए । यो टीममा चीन, म्यान्मार, भारत, बेलायत, लाओस, अस्ट्रेलिया, अमेरिका, जापान र अन्य देशका मानिस थिए । 

संसारभरिका मानिसले फसेका किशोरहरूका लागि सन्देश पठाए । मंगलवार ३५.९० करोडले थाइ केभ रेस्क्यु शब्दावली राखेर गूगल सर्च गरे । 

बेलायती गोताखोरहरूप्रति आभार व्यक्त गर्नका लागि विश्वकपको मंगलवार हुने सेमिफाइनल खेलमा इंग्ल्यान्ड टीमलाई चीयर गर्ने धेरैजसो थाइल्यान्डवासीले बताए । 

गुफामा ९० जना अनुभवी गोताखोर थिए । तिनमा ४० जना थाइल्यान्ड र बाँकी अन्य देशका थिए । 

प्रत्येक किशोरले पानीमा पस्नुअघि डाइभ मास्क लगाएका थिए । किशोरहरूलाई बाहिर ल्याउनका लागि अक्सिजन ट्यांक लगिएको थियो र एउटा डोरीमार्फत बाटो पत्ता लगाइएको थियो । 

हरेक किशोरका समथ दुईजना गोताखोर थिए । गुफाको सबभन्दा साँघुरो बाटो पार गर्न सबभन्दा गाह्रो थियो र त्यहाँ किशोरहरू गोताखोर विना नै निस्कनुपर्ने थियो । 

किशोरहरूलाई सुरक्षित रूपमा च्याम्बर ३ सम्म पु–याइयो जहाँ उद्धारकर्ताहरूले आधारशिविर बनाएका थिए । त्यहाँ केही बेर आराम गरेपछि किशोरहरूलाई बाहिर ल्याइयो । 

असार २२ गते पूर्व थाई नेभी सील कमान्डर समन गुनानको मृत्यु गुफाभित्र भयो । उनी किशोरहरूलाई एयर ट्यांक दिएर फर्किरहेको बेलामा गुफाभित्र अक्सिजनको कमीका कारण उनको ज्यान गयो ।

एजेन्सी