काठमाडौं –घरभित्र बाढी पसेपछि भक्तपुरको मध्यपुर ठिमी लगायत क्षेत्रका वासिन्दा समस्यामा परेका छन् । 

घरभित्र भएको सामग्री जोगाउनुपर्ने तनाव सँगसँगै खानपिनको जोहो गर्ने चिन्ताले समेत सर्वसाधारणलाई सताएको छ । खानपिनको चिन्ताले सताएका थुप्रै सर्वसाधारणमध्ये पर्छन्, भक्तपुरको सिर्जनानगर वस्तीका नेत्र खत्री । बाढीले खत्रीको घरभित्र भएको सबै खाद्यान्न बाढीले भिजाएको छ ।

बाढीको समस्याले खत्री आफू त भोकै बस्न सक्छन् । तर, छोराछोरीले ‘भोक लाग्यो’ भनेर गरिरहेको आग्रहले उनको आँखाबाट आँशु नै खस्यो । लोकान्तरसँग कुराकानी गर्दै खत्रीले भने, ‘छोराछोरी भोकभोकै छन्, खुवाउने केही छैन ।’ घरभित्र पानी पस्दा खत्रीको घरभित्रका धेरै सामान भिजेका छन् ।

बुधवार राति परेको भीषण वर्षाका कारण हनुमन्ते खोलामा आएको बाढीले भक्तपुरको मध्यपुर क्षेत्र डुबानमा परेको छ । बाढीका कारण भक्तपुरका जगाती र बाराही स्थानका बस्तीमा पानी पसेको छ भने भूकम्पपीडितको शिविर डुबानमा परेको छ । मध्यपुरकै राधेराधे र कमेरोटार जग्गा एकीकरण आयोजनाभित्र रहेका वस्ती डुबानमा परेका छन् ।

बाढी र पहिरोका कारण भक्तपुरमा ३ जनाको मृत्यु भएको छ । वर्षाले चाँगुनारायण नगरपालिका–७ तेलकोटस्थित मजुवामा आएको पहिरोले १ टहरो पुरिँदा एकै परिवारका ३ जनाको मृत्यु भएको छ ।