भक्तपुर – अविरल वर्षाका कारण हनुमन्ते खोलामा आएको बाढीले भक्तपुरको चारै वटा नगरपालिका क्षेत्रमा क्षति पुर्यायो ।  राति आएको बाढीले भक्तपुरका स्थानीय  र भूकम्पपछि  घर बनाउन नसकेर टहरा बनाएका बसेका भूकम् पपीडित तथा डेरा लिएर बस्नेको विचल्ली बनाएको छ ।

हनुमन्तेको बाढी वस्तीमा पसेपछि भक्तपुर नगरपालिकाको जगाते, हनुमानघाट, बाराही क्षेत्र, सिर्जनानगर, सल्लाघारी, लिवाली क्षेत्र डुवानमा परेका छन् । बिहीबार दिउँसो लोकान्तरकर्मी भक्तपुरको बाढी प्रभावित क्षेत्रमा पुग्दा त्यहाँका वासिन्दा कोठाभित्र पसेको बाढीको फोहोर र हिलो पानी बाहिर निकाल्दै थिए ।

राति ३ बजेदेखि वस्तीमा पानी पस्न थालेको र बिहानसम्म घरबाहिर निस्कन नसकेपछि सुरक्षाकर्मीको टोली बिहानैदेखि उद्दारमा खटिएको थियो । मानवीय क्षति हुन नदिन र बाढीभित्र फसेका स्थानीयको उद्दारका लागि सुरक्षाकर्मी खटिएपनि डुबानमा परेको घरका सामान र वस्ती व्यवस्थापनमा सरकारी निकायले कुनै पहल नगरेको बाढी पीडितले बताए । 

भक्तपुरको सिर्जनानगरमा कोठा भाडामा लिएर बस्दै आएकी पुनम पाण्डे कोठा बिहीबार दिउँसो कोठामा पसेको बाढीको फोहोर पानी बाहिर निकाल्दै कोठामा भिजेका सामान निकाल्दै थिइन् । ‘राति एक्कासी कोठा नै डुबाउने गरी बाढी पसेर अहिले बिजोग भयो, गाउँभन्दा सुखसुविधा होला भनेर शहर आइयो । शहरमा यो गति भयो,’ पाण्डेले बाढीले भिजेका सामान देखाउँदै लोकान्तरसँग भनिन् ।

भूइँतलामा बसेकी पाण्डे कोठामा भिजेको खाद्यान्न, कपडा, फर्निचरका सामाग्री माथिल्लो तलामा सार्नमा बिहानैदेखि व्यस्त थिइन् । उनी कोठामा भिजेको सामानभन्दा पनि अब राति के खाने र कहाँ सुत्ने भन्ने चिन्तामा छिन् । उनले भनिन्, ‘रातिको बाढीले सबै खाने, पकाउने सबै सामान भिजेपछि बिहान त घरभेटी दिदीले खाना खान दिइन्, अब बेलुका के खाने कहाँ खाने कहाँ सुत्ने केही थाहा छैन ।’

प्रभावित क्षेत्रमा घरको भूइँतलामा कोठा भाडामा लिएर बसेका अधिकांशको अवस्था पाण्डेको जस्तै छ । डेरा लिएर बसेका कोठामा भएका सबै सामान बाढीले डुबेपछि आजसाँझ कहाँ आश्रय लिने र के खाने भन्ने चिन्तामा छन् । भूकम्पपछि सामान्य टहर बनाएर बसेका सिर्जनानगरका नेत्र खत्रीको समस्या पनि डेरामा बस्नेको भन्दा कम छैन । बाढीले घरको खाद्यान्न सबै भिजेर बिग्रिएपछि उनको परिवार बिहानदेखि भोकभोकै छ ।

‘बाढीले सबै सखाप पारिदियो, हिजो बेलुका खाना खाएदेखि अहिलेसम्म मुखमा अन्न परेको छैन, छोराछोरी पनि भोकै छन् । घरमा खानेकुरा केही छैन, सामान पनि सबै भिज्यो, अब के खाने कहाँ सुत्ने अन्यौलमा छु,’ उनले भने ।

बोल्दाबोल्दै उनले आफ्नो आँशु थाम्न सकेनन् । छोराछोरी भोकभोकै हुँदा खानेकुरा किन्न समेत नसक्ने स्थितिमा रहेका खत्री बाढीले डुबेको घर र छोराछोरीको अनुहार हेर्दै बेलाबेलामा भक्कानिँदै थिए ।