जनकपुरधाम – २ नम्बर प्रदेशका मुख्यमन्त्री लालबाबु राउतलाई मातृशोक परेको छ ।

करीब ७० वर्षको उमेरमा शुक्रबार दिउँसो सवा ३ बजे मुख्यमन्त्री राउतकी आमा राधिका देवीको निधन भएको जनाइएको छ । सामान्य ज्वरो आएपछि उपचारको लागि उनलाई ३ दिनअघि भारतको रक्सौलस्थित डंकन अस्पतालमा भर्ना गरिएको थियो । 

उपचारका क्रममा उनको निधन भएको मुख्यमन्त्री राउतका स्वकीय सचिव दिपक यादवले बताए । ‘अन्तिम संस्कारको लागि आजै पैतृक गाउँ पर्साको जगन्नाथपुर ल्याउने र शनिबार बिहान ९ बजे मुस्लिम परम्परा अनुसार अन्तिम संस्कार गरिने छ,’ स्वकीय सचिव यादवले भने ।

मृतक राउतका २ छोरा र २ छोरी छन् । जेठो छोरा लालबाबु राउत २ नम्बर प्रदेशको मुख्यमन्त्री छन् भने कान्छो छोरा रामबाबु राउत कृषक छन् ।