जनकपुरधाम – (कुन्मिंग, युनान, चीनबाट फर्केर) – चीनको युनान प्रान्तको राजधानी कुनमिङ्ग शहरलाई फूलको शहर (सिटी अफ फ्लावर) भनिन्छ । त्यसको छनक त कुनमिङ्ग अन्तर्राष्ट्रिय विमानस्थलमा ओर्लने बित्तिकै पाइन्छ ।

विमानस्थलमा फूलको सुन्दर पेंटिङ्गले नै त्यसको झल्को दिन्छ भने बाटोमा आउने बित्तिकै सडकबीच डिभाइडरको रूपमा रहेको दुवैतर्फ हरियो रुखहरू र फूलहरू फूलेको बिरुवाले झन् शहरलाई अत्यन्तै आकर्षक र मनमोहक बनाउँछ ।

सफा र सुन्दर शहरको रूपमा विश्वमै आफ्नो पहिचान बनाउन सफल कुनमिङ्गको दौनानमा त अन्तर्राष्ट्रिय फूल औद्योगिक पार्क नै निर्माण गरिएको छ । जहाँ करीब २ हजार व्यापारीले फूल बेच्ने काम गर्छन् । ५ बिलियन युनानको लगानीमा विभिन्न ३ चरणमा निर्माण गरिएको पार्कमा मुख्यतया फूलकै व्यापार गरिन्छ ।

पार्कभित्र विभिन्न ८० प्रजातिका फूलको उत्पादन गर्ने उद्योग नै स्थापना गरिएको छ । जसमा ९ वटा ठूला र अन्य मझौला तथा साना उद्योगीले विभिन्न सांस्कृतिक फूलहरू उत्पादन गर्ने गर्छन् ।

दौनानको पार्क चीनकै प्रमुख ४ फूल उत्पादन गर्ने स्थलमध्ये १ हो । ३० वर्षभन्दा बढी समय लगाएर निर्माण गरिएको पार्कबाट उत्पादन गरिएका फूलले चीनकै करीब ७० प्रतिशत बजारलाई धानेको छ । पार्कले दक्षिण एसिया र दक्षिण पूर्वी एसियाका करीब ५० वटा देशमा फूल निर्यात गर्छ ।

पछिल्ला २० वर्षदेखि फूलको व्यापार चीनमा सबैभन्दा बढी परिणाम र मूल्यको ब्यापार बनेको छ । दौनान ताजा फूल काटेर बिक्री गर्ने रूपमा चीनमा मात्रै नभएर दक्षिण एसिया र दक्षिण पूर्र्वी एसियाका विभिन्न मुलुकमा पनि प्रथम स्थान बनाउन सफल भएको छ ।

सन् २०१७ मा करीब ८ बिलियन ताजा विरुवाको फूल काटेर बिक्री गरिएको थियो । त्यस वर्ष पार्कबाट व्यापारीले करीब ६ दशमलव ४ बिलियन युनान आम्दानी गरेका थिए भने करीब १ सय १४ मिलियन युनान चीन सरकारलाई राजस्व प्राप्त भएको थियो । सन् २०१६ को तुलनामा ८ दशमलव २६ प्रतिशतले बिक्री परिणाममा वृद्धि भएको थियो भने १५ दशमलव ४९ प्रतिशतको दरले रकममा वृद्धि भएको थियो ।

त्यहाँ २ हजार व्यापारी प्रत्यक्ष रूपमा फूलको व्यापार गरिरहेका छन् भने १० हजार व्यक्तिले फूल बिक्रेताको काम पाएका छन् । फूलको अन्तर्राष्ट्रिय बजार बढेपछि कुनमिङ्ग शहरमा मात्रै १० वटा ठूल्ठूला फूल प्याकिङ्ग गर्ने केन्द्रहरू खुलेका छन् । विश्वकै सबैभन्दा बढी ताजा फूल काटेर बिक्री गर्ने केन्द्रको रूपमा स्थान बनाउन सफल भएको कुन्मिङ्गमा लाखौं पर्यटक आउने गर्छन् । 

नेपाल एउटा कृषि प्रधान देश भनिएपनि व्यवहारिक रुपमा हुन सकेको छैन । कृषि उपजले गर्दा नेपालकै उत्तरी छिमेकी मुलुक चीनले आर्थिक विकास र रोजगारी सिर्जना गरेको तथ्य अनुकरण गरेर नेपालको आर्थिक समृद्धिको सपनालाई साकार गर्न सक्छ ।

नेपालको तराई मधेशका समथर भूमिमा फूल खेति गर्न सक्यो भने किसानले प्रत्यक्ष रोजगारी र आम्दानी गर्न सक्ने छन् । प्रचूर सम्भावनाका क्षेत्रको सदुपयोग हालसम्म हुन सकेको छैन । देश संघीयतामा गइसकेपछि प्रदेश सरकारले पनि त्यस्तो नीति ल्याएर प्रदेशलाई समृद्ध बनाउन सक्छ । जसबाट देशलाई पनि आर्थिक समृद्धिको बाटोमा डोर्याउन ठूलो योगदान हुन सक्छ ।

युनान पनि चीनको एउटा प्रदेश नै हो । त्यो प्रदेशले सफलता हात पार्न सक्छ भने नेपालको २, १ नम्बर र अन्य प्रदेशले किन नसक्ने ?