काठमाडौं– तस्करीको ३८ क्विन्टल सुन र मोरङका सनम शाक्य हत्या प्रकरणका मुख्य अभियुक्त चूडामणि उप्रेती (गोरे)का भाइ रमेश उप्रेती संयुक्त अरब इमिरेट्सअन्तर्गतको दुबई प्रहरीको सम्पर्कमा आएका छन् । 

सुन तस्करी प्रकरणमा संलग्न भनिएका रमेशविरुद्ध जिल्ला अदालत मोरङले पक्राउ पूर्जी जारी गरेपछि प्रहरीको अन्तर्राष्ट्रिय संगठन इन्टरपोलमा रेड कर्नर नोटिस जारी भएको थियो । 

नेपाल प्रहरीले इन्टरपोलमा रेड कर्नर नोटिस जारी गरेपछि दुबइ प्रहरीले रमेश आफ्नो सम्पर्कमा रहेको जानकारी नेपाल पक्षलाई दिएको हो । 

दुबई प्रहरीले रमेशविरुद्ध लगाइएको अभियोग पत्र, अदालतको पक्राउ पूर्जी लगायत कागजात मागेको नेपाल प्रहरी स्रोतले लोकान्तरलाई जानकारी दियो । 

दुबईको कानूनअनुसार त्यहाँको अदालती प्रक्रिया पुरा गरेर रमेशलाई केही दिनमै नेपाल ल्याइने प्रहरीका अधिकारीको भनाइ छ । 

सुन तस्करी र सनमको हत्या प्रकरणको छानबिन गर्न गृहमन्त्रालयका सह–सचिव इश्वर पौडेलको नेतृत्वमा गठित उच्चस्तरीय समितिले गरेको अनुसन्धानअनुसार जिल्ला सरकारी वकिलको कार्यालय मोरङले गोरेका भाइ रमेश र उनकी श्रीमती नर्वदा खरेल (उप्रेती)विरुद्ध जिल्ला अदालत मोरङमा अभियोग पत्र दायर गरेको थियो । 

गोरेकी श्रीमती नर्वदा भने अहिले पनि फरार छिन् ।