काठमाडौं – सरकारले संसदमा पेश गर्न लागेको राष्ट्रिय चिकित्सा शिक्षा विधेयक डा. गोविन्द केसीले उठाएका माग सम्बोधन गर्नेगरी आउनुपर्ने भन्दै प्रमुख प्रतिपक्षी दल नेपाली कांग्रेसले प्रतिनिधिसभाको दोस्रो बैठक पनि अवरुद्ध भएको छ ।

डा. केसीको माग र माथेमा आयोगको प्रतिवेदनका आधारमा विधेयक ल्याउनुपर्ने माग गर्दै कांग्रेसले संसदको दोस्रो बैठक पनि अवरुद्ध गरेको हो ।

सोमवार दिउँसो ३ बजे बसेको संसदको दोस्रो बैठकको शुरुमै सभामुखसँग समय लिएर कांग्रेस सचेतक पुष्पा भुसालले डा. केसीको माग पूरा गर्नुको सट्टा सरकार दम्भ पालेर बसेको आरोप लगाइन् ।

सांसद भुसाल बोलेलगत्तै कांग्रेस सांसदहरू उठेर विरोध जनाएका थिए । प्रतिपक्षले उठाएका मागको विषयमा मन्त्रीले जवाफ दिन समय माग गरेको भन्दै सभामुख कृष्णबहादुर महराले बस्न आग्रह गरे पनि कांग्रेसले विरोध जारी राखेको थियो ।

ʻप्रतिपक्षले सदन अवरुद्ध गरेको विषयमा सरकार बोल्न चाहेको छ, मन्त्रीले बोल्नको लागि समय लिनुभएको छ । सरकारको कुरा नै नसुनेर, पोजिटिभली सोचेको हुनसक्छ । मन्त्रीको कुरा सुनौं माननीय सदस्यʼ सभामुख महराले आग्रह गर्नुभयो ।

सभामुखको आग्रह पछि पनि कांग्रेसले अवरोध कायम राखेपछि प्रतिनिधिसभाको बैठक साउन ३ गते बिहीवार दिउँसो १ बजेसम्मका लागि स्थगित भएको छ ।

त्यसअघि सोमवार नै बसेको प्रतिनिधिसभाको पहिलो बैठक पनि कांग्रेसले अवरुद्ध गरेको थियो ।

बैठकमा शिक्षामन्त्री गिरिराजमणि पोखरेलले चिकित्सा शिक्षा विधेयक संसदमा पेश गर्ने कार्यसूची थियो ।