काठमाडौं – बेलायतमा खाना बर्बाद हुनबाट बचाउनका लागि एक अभियान शुरू गरिएको छ । त्यहाँ एडम स्मिथ र जो हर्कबर्ग नामक दुई व्यक्तिले जंक फूड स्टोर चेन खोलेका छन् । 

यो स्टोरमा रेस्टुराँमा बचेको खाना र सुपरमार्केटमा म्याद गुज्रेको सामान ल्याइन्छ । आवश्यकता परेकाहरूले स्वेच्छाले केही पैसा तिरेर खाना किन्छन् । त्यहाँ फल, सागपात, ब्रेड, केक र चिकन समेत सबै किसिमका खानेकुरा पाइन्छन् । 

यसलाई द रियल जंक फूड प्रोजेक्ट नाम दिइएको छ । सोमवारदेखि शनिवारसम्म जम्मा दुई घन्टाका लागि स्टोर खुल्छ । त्यतिखेर सामान किन्नेको लामो लाइन लाग्छ । 

केही अवसरमा कुनै चीजको स्टक धेर भएमा सामाजिक सञ्जालमा त्यसको जानकारी दिइन्छ र केही मिनेटमै बिकिहाल्छ । 

यो स्टोरमा ल्याइने खानेकुरा खानलायक नै हुन्छ तर सुपरमार्केटको मापदण्डकै त हुँदैन । कुनै खानेकुराको डब्बामा कोतरिएको हुनसक्छ वा टिन कुच्चिएको हुनसक्छ । कहिलेकाहीँ सागपातका डाँठहरू हरियो नभएर रातो भइसकेका हुन्छन् । 

एडमले यो स्टोर पहिलोपटक सन् २०१६ मा खोलेका थिए । अब यस्ता चार स्टोर छन् र ६ वटा थप स्टोर खोल्ने तयारी चलिरहेको छ । 

लगभग २५ हजार मानिसका लागि यहाँ हरेक हप्ता खाना उपलब्ध हुन्छ । ग्राहकहरूले यहाँबाट म्याद गुज्रेको सामान पनि लान्छन् । 

उनीहरू खानेकुरा सुँघ्छन् र चाख्छन् अनि मन प–यो भने प्रयोग गर्छन् । 

संयुक्त राष्ट्रसंघको तथ्यांकअनुसार, संसारभरि हरेक वर्ष १.३ अर्ब टन खाना फ्याँकिन्छ । उता ८० करोड मानिस खानाको कमीका कारण कुपोषणको शिकार भएका छन् । 

एडम यसअघि अस्ट्रेलियामा एक फार्ममा काम गर्थे । त्उहाँ सुँगुरहरूलाई काँक्रो खुवाइन्थ्यो । खासमा काँक्रो दानाभन्दा सस्तो थियो । 

तर कतिपय मानिस त त्यही काँक्रो पनि खान सक्दैनथिए । त्यसबाट नै उनलाई खाना बचाउने आइडिया फु–यो । उनले सुपरमार्केटमा गएर अनुसन्धान गर्दा म्याद गुज्रेको खानेकुरालाई ठेगान लगाउन पैसा तिर्नुपर्ने पत्ता लगाए । त्यसपछि नै
उनले खानेकुरा तथा सामान गरीबहरूसम्म पु–याउने काम शुरू गरे ।

एजेन्सी