बुटवल – आर्थिक वर्ष २०७४/७५ का लागि छुट्ट्याएकोमध्ये रुपन्देहीमा असार महिनामा मात्रै ४२ प्रतिशत बजेट खर्च भएको पाइएको छ । 

कोष तथा लेखा नियन्त्रण कार्यालय रुपन्देहीले आर्थिक वर्ष २०७४/०७५ को बजेटअन्तर्गत २१ अर्ब ८२ करोड १० लाख ७३ हजार ६७ रुपैयाँ ६६ पैसा अख्तियारी आएकोमा असार मसान्तसम्ममा ९० दशमलब ४३ प्रतिशत अर्थात १९ अर्ब ७३ करोड २९ लाख ४१ हजार ८ सय ८५ रुपैयाँ ३३ प्रसा खर्च भएको कोष तथा लेखा नियन्त्रण कार्यालय रुपन्देहीका कोष तथा लेखा नियन्त्रक मतिप्रसाद भुषालले बताए । 

असार महिनामा मात्र ४२ प्रतिशत बजेट खर्च भएको कार्यालयले जनाएको छ ।  चालुतर्फ १३ अर्ब ७९ करोड १४ लाख ६ हजार ७ सय ६७ रुपैयाँ ६६ पैसामध्ये ९३ दशमलब ७० प्रतिशत अर्थात् १२ अर्ब ९२ करोड २८ लाख १ हजार ५ सय ५७ रुपैयाँ ८३ पैसा खर्च भएको छ । त्यसैगरी पूँजीगत तर्फ ८ अर्ब २ करोड ९६ लाख ६६ हजार ३ सय रुपैयाँमध्ये ८४ दशमलम ८१ प्रतिशत अर्थात ६ अर्ब ८१ करोड १ लाख ४० हजार ३ सय २७ रुपैयाँ ५० पैसा खर्च भएको छ । विगतका वर्षमा भन्दा खर्चहरु सन्तोषजनक रहेको भुषालले बताए । 

कार्यालयले ४२ प्रतिशत पूँजीगत खर्च असारमा मात्र भएको जनाएको छ । कोष तथा लेखा नियन्त्रक कार्यालय रुपन्देहीले दिएको तथ्याङ्क अनुसार रुपन्देहीमा सबैभन्दा बढी पूँजीगत खर्च असारमा डिभिजन सडक कार्यालयले गरेको छ । यसको असारमा मात्र १ अर्ब ३० करोड ६३ लाख ९ सय ९९ रुपैयाँ भएको छ । यो कूल बजेट निकासको ८९ दशमलव २२ प्रतिशत हो । 

सडक डिभिजन कार्यालय मात्र होइन, रुपन्देही जिल्लाका हरेक विकासे आयोजनाका कार्यालयले धेरै पूँजीगत खर्च असारमै गरेको देखिएको छ । जसमा शहरी विकास तथा भवन विभाग डिभिजन कार्यालयले ४० करोड ७ लाख ६४ हजार ८० रुपैयाँ, लुम्बिनी परिक्रमा बर्दघाट पालडाँडा त्रिवेणी सडक योजनाले २५ करोड ९९ लाख ३ सय २९ रुपैया, व्यापारिक मार्ग विस्तार आयोजना (बेलहिया–बुटवल सडक) ले २४ करोड ६८ लाख ७९ हजार ६ सय ५२ रुपैया, पश्चिमाञ्चल सिँचाइ विकास डिभिजन नं ६ ले १२ करोड ९१ लाख ६३ हजार ७ सय ५९ रुपैयाँ र खानेपानी तथा सरसफाई डिभिजन कार्यालयले १० करोड ७१ लाख १३ हजार ४ सय ५५ रुपैयाँ खर्च गरेका छन् ।